Сарапшылар жасанды интеллект болашағын болжап көрді

Адам баласы алда не боларын қиял-ғажайып әңгімелер арқылы біледі. Өйткені қазір ертегі шындыққа айналып келеді. Көзге көрінбейтін, қолмен ұстауға келмейтін жасанды интеллект бала оқытады, үй шаруасын атқарады, тіпті шала тілшіге репортаж, дәлдүргіш ақынға өлең жазып береді деп кім ойлаған? Бірақ уақыт өтті, технология дамыды. Енді алдағы өмірімізді қандай өзгеріс күтіп тұр?

2050 жылға қарай медицина да, технология да бүгінгі түсінігімізден мүлде өзгеше болады. Жасанды интеллект дәрігердің негізгі серігіне, ал шаңырағымыздың әр бұрышы денсаулыққа жауапты смарт-кеңістікке айналуы мүмкін. Сарапшылар тіпті таңғаларлық болжамдар жасап отыр. Мәселен, болашақта тоңазытқыштағы сенсорлар дәрумен жетіспеушілігін анықтап береді, автокөлік жүргізушінің жүрек соғысын үздіксіз бақылап отырады, ал жарықтандыру жүйесі стресс деңгейіне қарай автоматты түрде өзгеріп тұрады. Қазірдің өзінде отаны роботтарға жасатып отырған елдер бар. Мамандар: «Бұл тек бастамасы ғана», – дейді.

Александр Чулок, халықаралық сарапшы:

- 2053 жылы жасанды интеллект пен роботтар медицина саласына толық еніп үлгереді. Маңызды шешімдерді адам қабылдайды, әрине. Бірақ сала мамандарының үштен бірі роботқа ота жасауды сеніп тапсыруға дайын. Тіпті қартаю ұғымының өзі өзгереді. Жасанды интеллект көмегімен 80 жаста да адам қартаймайды. 

Экономикалық ынтымақтастық және даму ұйымы да жаңа болжамын жариялады. Ұйым әлемдік экономиканың тұрақтылығына негізінен жасанды интеллектке құйылып жатқан рекордтық инвестициялар әсер етіп отырғанын айтады. Болжам бойынша келесі жылы АҚШ экономикасы 2%-, Қытай 5%, ал Еуроаймақ пен Жапонияның экономикасы 1,3% өседі.

Матиас Корманн, ЭЫДҰ бас хатшысы:

- Халықаралық сауда келісімдері неғұрлым әділ әрі тиімді жұмыс істеу керек.  Ол үшін үкіметтерді барынша табанды еңбек етіп, ынтымақтастықты жалғастыруға шақырамыз. Бұл ашық нарықтардың экономикалық артықшылықтарын және ережеге негізделген жаһандық сауданы барынша сақтауға мүмкіндік береді.

Ал енді тым алысқа бармай, таяп қалған 2030 жылға көз жүгіртсек. Төрт жылдан кейін смартфондар мүлде жоғалуы мүмкін. Олардың орнын көзге көрінбейтін дисплей немесе көзге тағылатын смарт-линзалар басуы ықтимал. Бұл туралы Илон Маск мәлімдеді. Демек ұялы телефондар дәуірі аяқталуы мүмкін, ал жаңа буын жасанды интеллектке негізделген құрылғыларға көшеді. Жасанды интеллекттің бірнеше маңызды салалармен тоғысуы – келешектің басты тренді. Сарапшылардың пайымынша, бұл өзгерістер адам өмірінің сапасын арттырып қана қоймай, адам мүмкіндігінің шекарасын да түбегейлі кеңейтеді. 

Авторы: Нұрбике Жігер