Сербияда автобус апатынан 3 адам қаза тауып, 35 адам жарақат алды

Жергілікті биліктің мәліметінше, қайғылы оқиға салдарынан үш адам қаза тауып, тағы 35 адам жарақат алды. 

Сербия Ішкі істер министрлігінің ақпаратына сәйкес, медициналық жабдықтар өндіретін компанияның жұмысшыларын тасымалдап келе жатқан автобус жергілікті уақытпен сағат 14:45 шамасында жолдан шығып кетіп, аударылып қалған. Апат Сремска-Митровица мен Ярак ауылдарының арасында, Белградтан шамамен 70 шақырым солтүстік-батыста болған.

Екі адам оқиға орнында көз жұмды, ал үшіншісі ауруханада алған жарақаттарынан қайтыс болды.

Жедел жәрдем қызметі оқиға орнына алты медициналық бригада жіберіп, 35 жолаушы Сремска-Митровица ауруханасына жеткізілді.

Аурухана өкілі жергілікті БАҚ-қа берген мәлімдемесінде зардап шеккендердің көбінде ауыр жарақаттар бар екенін хабарлады.

Осыдан бұрын Сербияда митинг өтіп, халық шұғыл кезектен тыс сайлау өткізуді талап еткенін жазған едік.