ШҚО дағы еріктілер мыңнан астам әлеуметтік шараны өткізуге атсалысты

Биыл шығыс қазақстандық еріктілер мыңнан астам әлеуметтік шараға мұрындық болды.

Белсенділер ондаған гектар аумақты көгалдандыруға атсалысып, мүгедектігі бар жандар мен жалғызілік адамдарға көмек қолын созды.

Мейірім мен жанашырлықты ту еткен жастар аптап ыстықта да, қақаған аязда да ізгі істерін тоқтатқан емес. Осы жолы олар 92 жастағы зейнеткердің ауласындағы қарын тазартты.

Вера Ларионова еріктілерді үнемі қуана қарсы алады. Жалғызілікті қария тек көмек күтпейді. Олармен шүйіркелесіп, әңгімелесудің өзі зейнеткерді бір серпілтіп тастайды. Белсенділер үйдегі тірлікті ыңғайлап, ауладағы қарды да күреп шықты.

Вера Ларионова, зейнеткер:

- Жолдың бәрін аршып, тазартып берді. Қоқыс үйіліп кеткен еді. Мына жаста еңкейіп бірдеме істеу де қиын. Сондықтан балаларға алғысым шексіз. Қашан да көмекке дайын тұрады.

Тізімде мұндай адамдар көп. Әсіресе жеке секторда тұратын қарттар көмекке мұқтаж.

Әнел Шәріпжанова, ерікті:

- Жалпы біздің орталықта 600-ден астам волонтер бар, оның барлығы жоғарғы оқу орындарынан және колледждерден жиналған студенттер, оқушылар яғни барлығымыз бірге ардагер қарияларға шын жүректен көмек көрсетеміз.

Бұдан бөлек жастар қақаған аязда көше тазалап жүргендерді де ұмытқан емес. Осы аптада қардың бір айлық мөлшері жауып, жұмысшылар тыным көрген жоқ. Еріктілер оларға ыстық шай ұсынып, тұрғындар атынан алғыстарын жеткізді.

Арна Арданбекқызы мына аллеяға жиі келеді. Ол замандастарымен бірге осында 200 түп көшет еккен. Енді соның өсіп өнуін назарда ұстап жүр.

Арна Арданбеккызы, қалалық еріктілер кеңсесінің жетекшісі:

-Бұл алллеяға келсем кеудемді қуаныш кернейді. Туған қаламыздың көркеюіне үлес қосқанымды мақтан тұтамын. Мен кішкентай кезімнен қайырылымдылық жасап, көмек көрсеткенді жақсы көремін. Бұл анамның тәрбиесі.

Жалпы облыста қазір 4 еріктілер тобы жұмыс істейді. Бес мың белсендінің басын біріктіріп отырған ұйым қоғамда ізгілік мен мейірім жолын насихаттап келеді.

Эльмира Ахметова, Дмитрий Пыхтин