Шығармашылық индустрияны қолдауға миллиардтаған қаржы бөлінеді

Мәдениет және ақпарат вице-министрі Евгений Кочетов 2026 жылғы 6 ақпанда Сенат отырысында Қазақстандағы шығармашылық (креативті) индустрияны қаржыландыру механизмі туралы айтты, деп хабарлайды Arasha.kz.

Сенат спикері Мәулен Әшімбаев шығармашылық индустрияны қолдау қорының көлемі қанша екенін және оған республикалық бюджеттен мемлекеттік қаражат тағы құйыла ма деген сұрақ қойды.

«Қазіргі болжам бойынша, бұл жылына шамамен 4 млрд теңгені құрайды. Себебі ұлттық лотерея операторы аударымдарының 3%-ы — өзгермелі сома. Сондықтан біз жылына шамамен 4 млрд теңге болады деп болжап отырмыз. Оның ішінде мемлекеттік бюджеттен тек қордың алғашқы үш жылына ғана қаражат қарастырылған, содан кейін қорда мемлекет ақшасы болмайды. Бұл — біз негізге алған принцип. Яғни, кейін бәрі тек біз инвестиция салатын жобалардың өзін-өзі ақтауы және ұлттық лотерея операторының аударымдары есебінен ғана жүзеге асырылады», — деп жауап берді Евгений Кочетов.

Ол сондай-ақ қаржылай емес қолдаудың қосымша шаралары да қарастырылғанын айтты.

«Шығармашылық индустрия қатысушылары мен кәсіпкерлер қордың резиденті бола алады. Оларға тегін үй-жайлар беріледі. Яғни, олар жалдау ақысын төлемейді және экстерриториалдылық принципі бойынша 20 өңірдегі кез келген хабта орналаса алады. Олар қордың барлық білім беру жобаларына — инкубациялық және акселерациялық бағдарламаларға қатысады. Бұл кәсіпкердің басындағы идеяны нақты коммерцияландыру деңгейіне дейін жеткізуге мүмкіндік береді», - деді вице-министр.

Бұған дейін Сенат депутаттары шығармашылық индустрияны қолдау және дамыту мәселелері бойынша түзетулерді қолдаған болатын. Құжат Мемлекет басшысына қол қоюға жіберілді.