Сіздер тым көп өтірік айтасыздар Германияда өлтірілген судьяның бұрынғы күйеуі алғаш рет пікір білдірді

Германияда қазақстандық судья Айгүл Сайлыбаеваның өліміне күдікті деп танылған аналы-балалы Донцовтар қазіргі уақытта Мәскеуде тұрып, жұмыс істеп жатыр. Ресейлік «112» телеграм-арнасының журналистері оларды тауып алып, эксклюзивті кадрларды жариялады, деп хабарлайды Arasha.kz.

Бейнежазбада Александр Донцов қылмысқа қатысы барын жоққа шығарып, өзіне жала жабылғанын айтады.

«2 ақпанда Александр мен Наталья Донцова Мәскеудің Тергеу комитетінде жауап берді. Бұл ретте Наталья РФ Конституциясының 51-бабын пайдаланып, тергеушімен сөйлесуден бас тартты», — деп хабарлайды арна дереккөзге сүйеніп.

Германияда Натальяға қатысты қылмыстық іс қозғалған, бірақ ол елден кетіп үлгерген. Кейінірек оның ұлы да Ресейге қоныс аударған.

Ресей Федерациясының Тергеу комитеті марқұмның анасының өтінішінен кейін судьяның өлімі дерегі бойынша тексеруді бастады. Тергеу мәліметінше, қылмысқа оның күйеуі мен енесінің қатысы болуы мүмкін.

Айгүл Сайлыбаева: Шеффилдте (Ұлыбритания) білім алып, кейін Астанада судья болып жұмыс істеген. Соңғы жылдары отбасымен бірге Германияда тұрған.

2024 жылғы 4 маусым: Айгүл екі жасар қызын балабақшаға апарып, содан кейін жоғалып кеткен.

16 маусым: Оның мәйіті қала шетінен пластик қапқа салынған күйінде табылған.

2025 жылғы желтоқсан: Қазақстан Донцовтарға халықаралық іздеу жариялады.