СҚО да антирабиялық көмекке жүгінген әр екінші адамды ит қапқан

Inform.KZ парақшасынан алынған ақпаратқа сәйкес, Qazaq24.com хабарлайды..

СҚО санитариялық-эпидемиологиялық бақылау департаменті басшысының орынбасары Арман Күшбасовтың айтуынша, былтыр өңірде жануарлар тырнап, қапқан 1 681 адам антирабиялық көмекке жүгінді. Ал 2024 жылы 1 421 тұрғын құтырмаға қарсы вакцина алған. Сондай-ақ антирабиялық көмек алғандардың 1 041-і немесе 62%-ы иттерден зардап шеккен. 520 адамды мысықтар, 128 адамды тышқан-егеуқұйрық, тиіндер тістеп, тырнаған.

– Көшеде иесіз жүрген иттердің саны азаяр емес. Салдарынан тұрғындар осы иттерден көп зардап шегеді. Мәселен Петропавлда мұндай жағдай 18%-ға өсіп, 59 дерек тіркелді. Ақжар ауданында 11 адамды, Шал ақын ауданында – 27, Жамбыл ауданында – 9, Тимирязев ауданында – 12, Есіл ауданында – 19, Мамлют ауданында – 10, Қызылжар ауданында – 20, Уәлиханов ауданында 12 адамды ит қапты, - дейді Арман Күшбасов.

Маманның айтуынша, былтыр елімізде құтырма ауруын жұқтырудың екі дерегі тіркелді. Олардың екеуінде де адамдарға індет үй жануарларынан жұққан. Бірінші жағдайда мысық тістеп алған, бірақ тұрғын мән бермей жүре берген.

Ал бір айдан кейін құтырма ауруының белгілері біліне бастаған. Бұл – емделмейтін ауру, зардап шегуші көз жұмды. Екіншісінде ит иесін қауып алған. Ер адам оны өлтіргенімен, өзі дәрігерге бармаған. Салдарынан ол да құтырмадан қайтыс болды.

– Жалпы, итті бос жіберуге тыйым салынған. Оны байлап немесе арнайы орында ұстау керек. Қарғыбаумен, тұмылдырық кигізіп қана серуендетуге болады. Олардың жабайы жануарлармен байланысына жол бермеу қажет. Сондай-ақ барлық иттерге құтырмаға қарсы вакцина салдырған жөн. Бұл індет адамға, ауырған жануарлардың тістеуі, тырнауы және сілекейі арқылы жұғады. Ауру жүйке жүйесін зақымдайды. Тыныс алу параличі ұстап, жүрек қызметі бәсеңдейді. Адам есін біліп жатып, қатты қиналып қайтыс болады, - дейді Арман Күшбасов.

Инкубациялық кезең бірнеше күннен үш айға дейін, сирек жағдайда 1 жылдан артық уақытқа созылады. Сондықтан үй жануарларынан немесе жабайы хайуандардан зардап шеккен жағдайда тістеген жерді 10-15 минут бойы сабындап жуып тазартып, жараны йод немесе спиртпен өңдеп, міндетті түрде тез арада дәрігерге қаралған жөн.

СҚО-да былтыр жануарлардан зардап шеккен 1,5 мың адам құтырмаға қарсы екпе алғанын жазған едік.

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.