Тоқаев: Бәйтерек арқылы ШОБ қа қолдау көлемі 2 трлн теңгеге жетті

Мемлекет басшысы жиында шағын бизнесті қолдаудың бірыңғай бағдарламасын жедел қабылдауды тапсырды.
Президент Қасым-Жомарт Тоқаевтың айтуынша, биыл «Бәйтерек» холдингі арқылы шағын және орта бизнеске көрсетілген қолдау шамамен 2 трлн теңгеге жетті.
Мемлекет басшысы қолдау шараларын тиімді етіп, экспортқа бағытталған, отандық шикізатты пайдаланып, жаңа технология енгізетін кәсіпорындарға басымдық беру қажет екенін айтты.

Тоқаев «Даму» қоры жанынан құрылған екі кепілдік қоры аясында 2229 жобаға 400 млрд теңгеден астам несие берілгенін, оның 220 млрд теңгесі мемлекеттік кепілдікпен қамтамасыз етілгенін жариялады.

Президент Үкіметке шағын бизнесті қолдаудың бірыңғай бағдарламасын жедел әзірлеуді тапсырды. Бағдарламада өңір ерекшеліктері мен кәсіпкерлерге көрсетілетін нақты қолдау тетіктері қамтылуы тиіс.

Сонымен қатар Тоқаев ауылдардан келетін ұсыныстардың маңызын атап өтіп, мысал ретінде тері өңдеу өндірісін жолға қою қажеттігін айтты. Оның сөзінше, мемлекет пен бизнестің тиімді әріптестігі ауылдар мен шағын қалалардың дамуына серпін береді.