Көлік саласында көрсетілген қызмет көлемі 2,9 трлн теңгеге жетті

Көрсетілген қызметтер көлемі 2,9 трлн теңгеге жетті, бұл 2025 жылдың сәйкес кезеңіндегі көрсеткіштен (2,4 трлн теңге) асып түседі.

Тасымалданған жүктің жалпы көлемі өткен жылдың қаңтар–наурыз айларымен салыстырғанда 8%-ға артып, 239,8 млн тоннаға ұлғайды (222 млн тонна).

Жолаушылар тасымалының көлемі 9,3%-ға өсіп, 483,7 млн адамға жетті. Ал 2025 жылдың осы кезеңінде бұл көрсеткіш 442,5 млн жолаушыны құраған болатын.

Жыл соңына дейін оң динамиканы сақтау ірі инфрақұрылымдық жобаларды іске асыру есебінен қамтамасыз етіледі. Атап айтқанда, жұмыстың барлық түрімен 11 мың шақырым автомобиль жолын қамту жоспарланған.

Теміржол саласында «Дарбаза — Мақтаарал» және «Мойынты — Қызылжар» жаңа желілерінің құрылысын аяқтау жоспарланған. Бұл желінің өткізу қабілетін арттырып, елдің транзиттік әлеуетін кеңейтуге мүмкіндік береді.

Азаматтық авиация саласында биыл Катонқарағай, Зайсан және Кендірлі туристік аймақтарында үш жаңа әуежайдың құрылысын аяқтау көзделген.

Көлік паркін жаңартуға ерекше көңіл бөлініп отыр. 2026 жылы 9 әуе кемесін сатып алу жоспарланған. Жыл басынан бері 3 ұшақ алынды: Air Astana — 1, SCAT Airlines — 2.

Сонымен қатар, 1800 бірлік жылжымалы құрамды жаңарту қарастырылған, оның ішінде: 236 локомотив, 1373 жүк вагоны және 191 жолаушылар вагоны бар.

— Аталған шараларды іске асыру көлік саласының тұрақты өсуін қамтамасыз етуге және 2026 жылдың қорытындысы бойынша нақты көлем индексінің жоспарлы 110% деңгейіне қол жеткізуге мүмкіндік береді, — делінген министрлік хабарламасында.

Бұдан бұрын Олжас Бектенов теміржол вокзалдарын жаңғырту жұмыстары баяу жүріп жатқанын сынады.