БЖЗҚ дағы жинақ көлемі 25,7 трлн теңгеге жетті үкімет

АСТАНА, 17 шілде – Sputnik. Үкімет 2026 жылдың бірінші жартыжылдығында әлеуметтік салаға бюджеттен бөлінген қаражаттың есебін берді.

Ынтымақты зейнетақы мен барлық зейнетақы төлемдерінің мөлшерін 10%-ға арттыру үшін қаңтар айынан бастап шамамен 4,9 трлн теңге бөлінді. Бұл қаражат 2,6 млн-ға жуық қазақстандық зейнеткерді қолдауға мүмкіндік берді.

"Индексация нәтижесінде жиынтық зейнетақының ең төменгі мөлшері 105 мың теңгеге дейін өсті, ең жоғары мөлшері 238 мың теңгеге жетті, ал орташа көрсеткіш 198 мың теңгені құрады. Сонымен қатар жинақтаушы зейнетақы жүйесі өзінің тұрақтылығын көрсетіп отыр: Бірыңғай жинақтаушы зейнетақы қорындағы (БЖЗҚ) жалпы жинақ көлемі 25,7 трлн теңгеге жетіп, жұмыспен қамтылған халықтың шамамен 69%-ын қамтыды", – деп хабарлады үкімет.

Сондай-ақ үкімет 2026 жылы отбасылар мен балаларды қорғау шаралары күшейтілгенін атап өтті. Жас ата-аналарды қолдау үшін мемлекет бала тууына байланысты біржолғы жәрдемақы түрінде 149,8 мың адамға 29,6 млрд теңге төледі.

"Тағы 131,2 мың жұмыс істемейтін ата-ана бір жарым жасқа дейінгі бала күтімі бойынша ай сайынғы көмек алып жатыр. Бұл төлемдердің жалпы сомасы 21 млрд теңгені құрады. Көпбалалы аналарды қолдауға ерекше көңіл бөлінуде: мемлекеттік жәрдемақыларды 248,7 мың марапатталған ана алады, оларға 43,9 млрд теңге төленді. Ал 636 мың көпбалалы отбасыға көрсетілген ай сайынғы қолдау көлемі 303,3 млрд теңгені құрады", – деді үкімет.

Асыраушысынан айырылған отбасыларға және басқа да әлеуметтік жағдайларға байланысты төлемдерді 896,3 мың адам алды. Жалпы төлем көлемі 332,7 млрд теңгені құрады.

"Оның ішінде еңбек ету қабілетінен айырылған 92,7 мың азаматқа 25 млрд теңге, ал асыраушысынан айырылған 66 мың отбасыға 19,1 млрд теңге көлемінде көмек көрсетілді. Сонымен қатар жұмысынан айырылған кезде әлеуметтік сақтандыру жүйесі қауіпсіздік құралы ретінде жұмыс істеп, 236,5 мың адамға 62,6 млрд теңге төледі. Жүктілік және босану кезеңінде 70,1 мың әйелге 72,7 млрд теңге, ал бала күтімі бойынша 431 мың алушыға 153,3 млрд теңге бағытталды", – деп хабарлады үкімет.

Атаулы әлеуметтік көмек 36,4 мың отбасындағы 196,4 мың адамға тағайындалды. Оның жалпы сомасы 17 млрд теңгені құрады. Алушылардың басым бөлігін балалар мен көпбалалы отбасылар құрайды.

"Атаулы әлеуметтік көмек алатын отбасылардағы мектепке дейінгі жастағы 61 мың балаға қосымша ай сайынғы төлем тағайындалды. Мүгедектігі бар 545 мың азаматқа төленетін жәрдемақылар 10%-ға өсіп, орта есеппен 87 мың теңгені құрады", – деп атап өтті үкімет.