Украинада ер адам теміржол вокзалында граната жарды: төрт адам қаза тапты

Украинаның Житомир облысында ер адам пойызда граната жарып, төрт адам және өзі қаза тапты, деп хабарлайды Arasha.kz.

Бұл туралы «Интерфакс-Украина» агенттігіне құқық қорғау органдарындағы дереккөз хабарлаған.

Алдын ала мәлімет бойынша оқиға Овруч қаласында құжаттарды тексеру кезінде болған.

«Ер адам қайда және не үшін бара жатқанын түсіндіре алмаған. Шекара қызметкері оны сыртқа шығуды сұрағаннан кейін, ол гранатаны жарып жіберген» деді дереккөз.

Жарылыс салдарынан қаскөйдің өзі, шекарашы және пойыздың тағы үш жолаушысы қаза тапты.

Оқиға орнында полиция қызметкерлері мен жедел-тергеу топтары жұмыс жүргізіп жатыр.

Украинаның Ұлттық полициясы да граната жарылысының салдарынан төрт адамның қаза тапқанын растады. Олар оқиғаның Житомир облысы Овруч қаласының перронында болғанын атап өтті.

Полиция мәлімдемесіне сәйкес, гранатаны 23 жастағы Харьков тұрғыны іске қосқан.

Алдын ала анықталғандай, Украинаның Мемлекеттік шекара қызметінің (ГПСУ) қызметкерлері жолаушылардың құжаттарын тексеріп жатқан.

«Осы кезде перронда тұрған ер адамдардың бірі жарылғыш затты шығарып, сол сәтте жарылыс болды.

Нәтижесінде гранатаны іске қосқан 23 жастағы Харьков тұрғыны қаза тапты. Сондай-ақ Коростень ауданында тұратын 29, 58 және 82 жастағы үш әйел ауыр жарақат алып, көз жұмды. Марқұмдардың бірі шекарашы»,- деп көрсетілген хабарламада.

Ұлттық полиция мәліметінше, қазіргі уақытта 12 адамның жараланғаны белгілі. Олар медициналық мекемеде қажетті көмек алуда.