Ұланда ілкімді істер көп

Ұлан ауданында биыл 52 шақырым жол мен көше жөнделіп жатыр. Ол туралы облыс әкімі Нұрымбет Сақтағанов Ұлан ауданының халқымен кездесуде айтты. Ауданға жұмыс сапарымен барған өңір басшысы кездесуден кейін бірқатар әлеуметтік нысанды аралады.

– Ұлан ауданының агроөнеркәсіптік кешенде, өнеркәсіпте, туризм саласында даму мүмкіндіктері зор. Ауданның 2029 жылға дейінгі даму жоспарына сәйкес, 15,8 млрд теңге бюджет қаражатын, 357,9 млрд теңге жеке инвестиция тарту жоспарланған. Бүгінде жалпы құны 8,8 млрд теңгені құрайтын жылу оқшаулағыш материалдар зауытының құрылысы жүргізіліп жатыр, – деп мәлімдеді облыс әкімі.

Тұрғындар өз кезегінде респуб­ликалық маңызы бар жолдан Митро­фановка ауылына дейінгі жолды, Пролетарка ауылы ішіндегі жолдарды жөндеу керектігін алға тартты. Облыс әкімінің айтуынша, Митрофановка ауылына кіреберіс жолды 484,9 млн теңгеге орташа жөндеуге, Пролетарка ауылы ішіндегі жолдарды 154 млн теңгеге жөндеуге сметалық құжаттама әзірленген. Жобалар келесі жылы жүзеге асады. Сондай-ақ халық Дубы­ғалы көліне дейін апаратын жолдың жоқтығын айтты.

– Аталған көлдің туристік әлеуеті жоғары. Алайда Гагарино ауылы арқылы өтетін жолдың жоқтығы ішкі туризмнің дамуын шектеп, аймақтың инвестициялық тартымдылығын төмендетеді. Мәселені шешу мақс­атында Дубығалы көліне апаратын жол аудандық маңызы бар жолдар тізіміне енгізілді, – деді Н.Сақтағанов.

Аудан жұртшылығы өздерін толған­дырған басқа да сауалдарын қойып, нақты жауап алды. Келелі кездесуден кейін облыс әкімі Сар­товка ауылындағы Шығыс Қазақстан көпсалалы колледжіне барды. 1945 жылы құрылған колледж студенттерді ауыл шаруашылығы, техника саласы, IT бағыттары бойынша тоғыз мамандыққа оқытады. Білім орда­сындағы 424 студенттің 73-і дуалды оқыту жүйесі арқылы теорияны өндірістік тәжірибемен ұштастырып жүр. Колледждің 1973 жылы салынған жатақханасында 192 студент тұрады. Олардың ішінде Алматы, Жамбыл облыстарынан, Шымкент, Түркістан, Семей, Қарағанды қалаларынан келгендер де бар.

Ұлан ауданында білімнен бөлек спортқа да жіті көңіл бөлініп отыр. Осы күні Таврия ауылында заманауи дене шынықтыру-сауықтыру кешені ашылды.

– Бұл кешен ауылға тың тыныс беріп, жаңа өмір салтының бастауына айналады деп сенеміз. Осындай нысандар ауыл жастарының денсаулығын нығайтып қана қоймай, олардың бойында табандылық пен жеңіске деген сенім қалыптастырады. Биыл өңірде осындай 3 кешен пайдалануға беріледі, – деді облыс әкімі.

Кешеннің жалпы алаңы 1 284,2 шаршы метр. Онда спорттық-сауықтыру іс-шаралары, бокс, күрес, ауыр атлетика жарыстарын өткізуге болады. Ғимарат ішінде заманауи жаттығу залдары, киім ауыстыратын бөлмелер, санитарлық тораптар, медициналық пункт, құрал-жабдық сақтайтын бөлмелер бар.

Таврия ауылындағы қуаттылығы 5,4 МВт жаңа орталық қазандық та әлеуметтік нысандар мен тұрғын үйлерді орталықтандырылған жылумен қамтамасыз етуге бағытталған. Облыс әкімі Нұрымбет Сақтағанов қазандық жұмысымен де танысты. Жобаны «Терезе» ЖШС мердігер компаниясы жүзеге асырып жатыр. Қаржы республикалық, облыстық бюджеттерден, Ұлттық қордан бөлінген. Жоба құжаттамасына сәйкес, қазандыққа жалпы жылу жүктемесі 2,801 МВт болатын 16 нысанды қосу жоспарланған. Биылғы жылыту маусымында балабақша, мектеп, аурухана, әкімдік ғимараттары қосылды. Мәдениет үйі, спорттық-сауықтыру кешені, мешіт, «ШҚО-ХОСПИС» мекемесі, дүкендер мен көпқабатты тұрғын үйлерді қосу кезең-кезеңімен жүргізіліп жатыр.

Ұлан ауданының тұмса табиғаты туризмді дамытуға сұранып тұрған, географиялық орны өңірдің әлеуетін арттыруға таптырмас жер. Тоғыз жолдың торабында жатқан жер өзен-көлге, орман-тоғайға өте бай. Ілкімді істерімен батыл алға басып келе жатқан өндіріс ошақтары да аз емес. Осының бәрі бас құрай келіп, ауданның даму барысы қарқынға қарқын қоса береді дегенге кәміл сендіреді.

Шығыс Қазақстан облысы,

Ұлан ауданы