Венесуэла Трамптың ресурстарды ұрлау туралы мәлімдемесіне қарсы шықты

Венесуэла үкіметі АҚШ президенті Дональд Трамптың елдің табиғи байлықтары туралы айтқан сөздерін қатаң сынға алды. Билік өкілдерінің айтуынша, венесуэлалық халық өз жерін, байлығын және еркіндігін қорғауда берік ұстанымда, деп хабарлайды АА.

Вице-президент Дельси Родригестің Telegram-арнасында жарияланған ресми мәлімдемеде Трамптың әрекеттері халықаралық құқық нормаларын өрескел бұзу деп бағаланды. Каракас бұл мәселе бойынша БҰҰ-ға ресми шағым түсіретінін хабарлады.

«Венесуэла өз ресурстары мен теңіздегі еркін сауда құқығын қорғауды жалғастырады. Біз халықаралық құқық пен БҰҰ Жарғысына сәйкес әрекет етеміз», – делінген мәлімдемеде.

Үкімет Трамптың «Венесуэла АҚШ-тан мұнай, жер және басқа активтерді ұрлады» деген айыптауын «жалған әрі қауіпті» деп атады. Венесуэла тарапы бұл сөздерді елдің ресурстарын күшпен тартып алу ниеті бар «колониялық риторика» деп сипаттады.

Мәлімдемеде халықтың, әскер мен полицияның бірлікте елдің тәуелсіздігін, жерін және байлығын қорғауға дайын екені ерекше атап өтілді. «Венесуэла ешқашан қайтадан ешбір империяның отарына айналмайды», – делінген құжатта.

АҚШ президенті Дональд Трамп Венесуэлаға кіріп-шығатын барлық санкцияға іліккен мұнай танкерлерін толық блокадаға алуды тапсырғанын жариялады. Ол әлеуметтік желідегі жазбасында «Венесуэла тарихтағы ең ірі әскери армадамен қоршалды» деп мәлімдеді.

Трамптың айтуынша, блокада Венесуэла «ұрланған» мұнай мен жерді қайтарғанға дейін жалғасады. Ол Мадуро режимін «терроризмді, есірткі саудасын және адам саудасын қаржыландырып отыр» деп айыптады.

АҚШ президенті «Америка өз ресурстарын ешкімге бермейді және Венесуэла барлық активтерді дереу қайтаруы тиіс» деп қосты.

Бүгін, 12:08