Вице президент лауазымы: Қазақстанда жаңа талап пен шектеулер талқыланып жатыр

Қазақстанда вице-президент лауазымына қойылатын шектеулер мен талаптар талқыланып жатыр. Ұсынылып отырған нормалар туралы Конституциялық реформа жөніндегі комиссияның кезекті отырысында Әділет министрі Ерлан Сәрсенбаев айтып берді, деп хабарлайды Информбюро.

Оның айтуынша, вице-президент өкілді органның депутаты бола алмайды, басқа да ақы төленетін лауазымдарды атқара алмайды, кәсіпкерлік қызметпен айналыса алмайды және саяси партиялардың мүшесі бола алмайды. Министр ұсынылып отырған шектеулердің көбі қолданыстағы конституциялық талаптарға сәйкес келетінін және осы лауазымның кәсіби және саясиландырылмаған мәртебесін қалыптастыруға бағытталғанын атап өтті.

Сәрсенбаев мемлекет басшысының тапсырмасы бойынша вице-президент елдің сыртқы өкілдігін қамтамасыз ететінін, негізгі мемлекеттік институттармен өзара іс-қимыл жасайтынын, сондай-ақ азаматтық қоғаммен, ғылыми, мәдени және сараптамалық қоғамдастықпен диалогты дамытатынын атап өтті. Бұл ретте өкілеттіктердің тізбесі базалық сипатта болады және қажет болған жағдайда президент нақтылай алады.

Қазақстанда вице-президент лауазымын енгізу туралы бастама 20 қаңтарда айтылды. Ол кезде Қасым-Жомарт Тоқаев Қызылордада өткен Ұлттық құрылтайдың V отырысында мемлекеттік билік жүйесінде осы лауазымды құруды ұсынған болатын.

Бүгін, 11:55