Жамбыл облысында мыңдаған тұрғын баспаналы болады

Жамбыл облысында үй кезегінде тұрған төрт мыңға жуық адам биыл баспанамен қамтылады. Олардың жартысына жуығы әлеуметтік осал топтағылар. Баспанаға мұқтаж жандарға арнап үй салуға республикалық және жергілікті бюджеттен 39,7 млрд теңге жұмсалды. Көпқабатты тұрғын үйдің көбі облыс орталығындағы «Ұлы Дала», «Шапағат» және «Балауса» шағын ауданында салынуда. 

Қаланың шығыс бөлігінде бой көтеретін «Балауса» шағын ауданында қазір 22 үйдің құрылысы жүріп жатыр. «Бес үй жақында қолданысқа берілсе, қалғаны жыл соңына дейін тапсырылады», - дейді мамандар. Жалпы жаңа ауданда алдағы уақытта  салынатын көпқабатты 145 үйге 14 мыңнан аса адам қоныстанады деп жоспарланып отыр.

Абзал Наржанов, қалалық құрылыс бөлімінің бас маманы:

- 48 көпқабатты тұрғын үйдің құрылысы аяқталған жағдайда кезекте тұрған азаматтарға 2800 пәтер беріледі. Олардың ауқымы 157 мың шаршы метрді құрайды. Биыл басталатын 30 үйдің құрылыс жұмыстары келесі жылы жалғасатын болады. Сондай-ақ 36 үйдің құрылыс жұмыстарына қаражат қарастырылған жағдайда ол жұмыстар да қарқынды жүреді.