Жетісу облысының туризмін дамытуға 53 млрд теңге бөлінді

Балқаш жағасында демалатын туристер саны артуы мүмкін, деп хабарлайды 24KZ. Келер жылы Лепсі станциясында жаңа теміржол вокзалы ел игілігіне беріледі.

Қазіргі таңда көл жағалауындағы 6 коммуналдық жағажайдың инфрақұрымы күрделі жөндеуден өтіп жатыр. Жағалауды абаттандыру, жеке инвесторларды тарту, қосымша демалыс аймақтарын салу жұмыстары қоса атқарылып жатыр. Жетісу облысындағы туризмді түлету шараларын аймақ басшысы Бейбіт Исабаев баяндап берді. Орталық коммуникациялар қызметі алаңында өткен брифингте аймақ басшысы бір жылда атқарылған жұмысты қорытындылады. Облыс әкімінің сөзінше, жыл сайын өңірге 2 миллионнан астам турист келеді. Демалушыларға қолайлы жағдай жасау күн тәртібінен түспеген. Биыл жаңа «Ақши-Бескөл» электр желісі және қосалқы станциясы іске қосылды. Мұнымен қоса жағалауды нығайту бөгеттерінің және кәріз тазарту құрылғысының құрылыстары жүргізілген.

Бейбіт Исабаев, Жетісу облысының әкімі:

- Өңірде туризм саласы ерекше назарда. Облыс құрылған сәттен бастап бұл салаға мемлекеттік бюджеттен 53 млрд теңге бөлінді. 64 жаңа нысан пайдалануға берілді. Биыл облыста жаңадан Туризм басқармасы құрылды. Алакөл және Балқаш көлдерінің жағалауын күтіп-ұстау үшін екі коммуналдық мекеме ашылды. Жыл сайын өңірге 2 миллионнан астам турист келеді. Олардың келіп-кетуіне және демалуына қолайлы жағдай жасау – басты міндет.