Биыл Қостанай облысының агросаласына 207 млрд теңге бөлінді

Қостанайда Ауыл шаруашылығы қызметкерлері күніне арналған салтанатты іс-шара өтті. Жиынға шаруашылық басшылары, көп жылдан бері ауыл шаруашылығы саласында еңбек етіп келе жатқан қарапайым жұмысшылар,  мемлекеттік қызметшілер қатысты, деп хабарлайды Egemen.kz.

Облыс әкімі шаруаларды кәсіби мерекелерімен құттықтап, ауыл шаруашылығын дамыту, агроөнеркәсіп кешенін цифрландыру, инфрақұрылымды жаңғырту тәрізді маңызды міндеттерді шешумен бірге, бизнес  кейінгі жылдары ауылға қолдау көрсету бағытында едәуір белсенді бола бастағанын айтты.

Өңірде кәсіпорындарды техникалық қайта жарақтандыру, ауылшаруашылық өнімдерін тереңдете өңдеу жобалары қолға алынып жатыр. Мемлекет басшысының тапсырмасымен ауыл шаруашылығы құрылымдарын қолдаудың жаңа тетіктері іске қосылды.  2025 жылы салаға 207 млрд теңге бөлінді. Бұл өткен жылмен салыстырғанда 60 пайыз, ал 2023 жылмен салыстырғанда екі есе көп. Нәтижесінде облыс диқандары биыл алқаптан 7 млн тоннадан астам өнім жинап, соңғы он жыл ішіндегі ең жоғары көрсеткішке жетіп отыр.

Облыс әкімі шаруашылық басшыларына ауылды кешенді дамыту қажеттігін тағы ескертті. Айтуынша, соңғы үш жыл ішінде ауыл тұрғындарына қолайлы жағдай жасау үшін шамамен 254 млрд теңге бөлінген. Ауылдық мекендерде түрлі мемлекеттік бағдарламалар аясында сапалы ауыз су тартылып,  тұрғын үй, мектеп, балабақша, медицина және спорт нысандары салынып жатыр.

Құмар Ақсақалов ауылды дамытуға ерекше үлес қосқан бірқатар кәсіпорындарды атады. Мысалы, Қостанай ауданындағы «Аян-озат», «Александровское» Қамысты ауданындағы «Алтынсарин», Денисов ауданындағы «Фрунзенское» серіктестіктері, Ұзынкөл ауданындағы «Мирас» шаруа қожалығы тәрізді кәсіпорындар ауылды абаттандыру, тұрғын үй салу, ауыл спорты мен мәдениетін қолдау бағытында ауыз толтырып айтарлықтай тұщымды іс тындырған. 

Аймақ басшысының сөзінше, өңірде мал шаруашылығын дамытуға ерекше көңіл бөлініп, заманауи жоғары технологиялы сүт фермалары салынып жатыр. 2025-2027 жылдары облыста жалпы құны 383 млрд теңге болатын 93 инвестициялық жоба іске асырылмақ. Сондай-ақ, өңдеу саласында 18 жоба іске асырылып, 3 мыңға жуық жаңа жұмыс орны ашылады.

Облыс әкімі іс-шара соңында ауылды көркейтуге, ауыл тұрғындарының өмір сүру сапасын арттыруға елеулі үлес қосып келе жатқан кәсіпкерлерді марапаттады.