Абайдың "Толық адам" тұжырымдамасы: Қанша мектеп қамтылды

Биыл жыл басында Қазақстанның мемлекеттік жалпыға міндетті білім беру стандарты мен педагогтердің сабақ жоспарларына Абайдың "Толық адам" (Нұрлы ақыл, Ыстық қайрат, Жылы жүрек) тұжырымдамасы аясында отаншылдық, ынтымақ, әділдік, еңбексүйгіштік сынды бірқатар ұлттық құндылықтар жүйелі түрде енгізілген болатын. Қазір бағдарлама 20 мыңнан астам білім беру ұйымдарында жүзеге асырылып жатыр. Бұл туралы үкімет басшысының орынбасары Серік Жұманғариннің мәжіліс депутаттарына берген жауабында айтылған. 

"Бағдарлама 20 мыңнан астам білім беру ұйымдарында жүзеге асырылуда (оның ішінде 11 мыңнан астам мектепке дейінгі ұйым, 7 мыңнан астам мектеп, 700-ден аса колледж). 577 мыңнан астам ата-ана мен мұғалімнің қатысуымен (286 мың ата-ана, 291 мың мұғалім) 44 мыңға жуық іс-шара ұйымдастырылды", – делінген Серік Жұманғариннің жауабында. 

Сондай-ақ, 2024-2025 оқу жылында "Қамқор", "Еңбегі адал жас өрен", "Smart бала", "Шабыт", "Ұшқыр ой алаңы", "Балалар кітапханасы" атты 6 негізгі жоба жүзеге асырылды. "Қамқор" жобасы бойынша оқушылардың үздік экожобалары "Tazalike" экофестивалі аясында Мемлекет басшысына таныстырылды. Барлық облыста өткен мектеп бітірушілердің ағаш отырғызу челленджіне мыңдаған оқушы қатысып, 185 мыңнан астам көшет егілді. 

"Шабыт" жобасы аясында "Күй күмбірі", "Ананың аялы алақаны" (1,2 млн оқушы қатысты) атты ауқымды акциялар өткізілді, 1800 мектептік театр қойылымдары ұйымдастырылды. "Таза Қазақстан", "Заң және тәртіп", "Адал азамат" тақырыптары бойынша республикалық эссе конкурсы өткізілді. Ең үздік жұмыстар 23 мамырда өткен "Білімім – Отаныма!" атты бірыңғай сынып сағатында таныстырылды. "Smart бала" жобасы аясында 200-ден астам әлеуметтік және инновациялық бастама әзірленіп, жүзеге асырылды. Аталған жұмыс жүйелі түрде жалғасуда", – деп жауап берді Серік Жұманғарин.