"Тәуелсіздік ұрпақтары" грантына биыл қанша адам үміткер

2025 жылы Қазақстанда "Тәуелсіздік ұрпақтары" гранты қараша айында табыс етіледі. Оған 1391 үміткер құжат тапсырған. Грант "Ғылым", "Мәдениет", "Ақпараттық технологиялар", "Бизнес", "Медиа" және "Волонтерлік" аталатын 6 бағыт бойынша табысталады. 

"Тәуелсіздік ұрпақтары" грантын беру үшін конкурстық комиссияның сапалы құрамын қалыптастыру мен 2025 жылғы грант иегерлерін салтанатты марапаттау рәсімін ұйымдастыру бойынша жұмыстар жүргізіліп жатыр. Марапаттау рәсімін биылғы қараша айында өткізу жоспарланған", – делінген үкімет басшысының орынбасары Серік Жұманғариннің мәжіліс депутаттарына берген жауабында. 

Еске салайық, осы кезге дейін 123 грант иегері анықталды Оның ішінде грант 2021 жылы 30 адамға, 2022 жылы 33 адамға, 2023 жылы 30 адамға және 2024 жылы 30 адамға табысталды. 

"2021 жылдан бастап семлекет басшысының бастамасымен шығармашыл жастарды қолдау мақсатында жыл сайын 3 миллион теңге көлемінде "Тәуелсіздік ұрпақтары" гранты берілуде. Грантқа 14 жастан 35 жасқа дейінгі Қазақстан Республикасының азаматы үміткер бола алады", – деді Серік Жұманғарин. 

Грант мынадай 6 бағыт бойынша жобаларды іске асыру үшін конкурстық негізде беріледі: 

"Ғылым" – жаңа ғылыми жобаларды және зерттеулерді іске асыруға арналған;  "Мәдениет" – Қазақстанның мәдени мұрасын танымал етуге, халықтық мәдени дәстүрлер мен өнерді ілгерілетуге бағытталған жобаларды іске асыруға арналған;  "Ақпараттық технологиялар" – жаңа IT шешімдер мен жобаларды, оның ішінде жаңадан басталған стартап жобаларды іске асыруға және әзірлеуге арналған;  "Бизнес" – жаңа бизнес-идеяларды іске асыруға арналған;  "Медиа" – жаңа медиа жобаларды, оның ішінде жастар үшін танымдық, пайдалы, қызықты контент құру жөніндегі жобаларды іске асыруға арналған;  "Волонтерлік" – өзекті, әлеуметтік проблемаларды шешуге бағытталған волонтерлік жобаларды (бастамаларды) іске асыруға арналған.