Қандастар, көпбалалы отбасылар кәсіп бастауға қайтарымсыз грант ала алады. Ол үшін не істеу керек?

20 қазаннан бастап жаңа бизнес-идеяларды іске асыруға арналған қайтарымсыз гранттарға өтінім қабылдау басталады. Қазақстанның 9 өңірінде тұратын азаматтар грант ұтып алып, сол ақшаға кәсібін бастай алады.

Ол үшін не істеу керек? Кімдер өтінім бере алады? Қандай құжаттар қажет? Информбюро порталы осы және өзге де сұрақтарға жауап береді.

№1. Кімдер грант ала алады?

Грант конкурсына:

тіркелген жұмыссыздар; жеке кәсіпкерлер (үш жыл тіркелген) қатыса алады.

Бұл жағдайда өтініш беруші келесі әлеуметтік санаттардың біріне жатуға тиіс:

мүгедектігі бар адамдар; қандастар; өңіраралық қоныс аударушылар; аз қамтылған отбасы мүшелері; көпбалалы отбасы мүшелері (жұбайы не зайыбы); мүгедектігі бар баланы тәрбиелеп отырғандар; асыраушысынан айырылу бойынша жәрдемақы алушылар.

Үміткерде "Бастау Бизнес" жобасы бойынша кәсіпкерлік негіздеріне оқыту туралы сертификаты (үш жылдан аспайтын) болуы керек. 

№2. Грант сомасы қандай?

Гранттар қайтарымсыз негізде беріледі. Негізгі мақсаты – жаңа бизнесті ашуға және дамытуға қолдау көрсету.

Грант сомасы – 400 АЕК (1 572 800 теңге). Бұл қаржы ісін жаңа бастаған кәсіпкерлерге өз әлеуетін ашуға, өндірісін жолға қоюға және тұрақты табыс көзіне ие болуға мүмкіндік береді. Әр қатысушы грантты тек бір рет ала алады.

№3. Қай өңірдің тұрғындары қатыса алады?

270 грант мына өңірлерге бөлінеді

Абай облысы; Ұлытау облысы; Ақмола облысы; Шығыс Қазақстан облысы; Қызылорда облысы; Павлодар облысы; Солтүстік Қазақстан облысы; Түркістан облысы; Шымкент қаласы. 

№4. Қалай өтінім береді?

Грантқа өтініш беру үшін үміткерлер:

business.enbek.kz порталында тіркелу; грант алу шарттарына сәйкестігін тексеруден өту; бизнес-жоспар үлгісін жүктеп, оны толтырып порталға енгізу; өтініш нысанын толтырып, ЭЦҚ қол қою.

Интернет не компьютер қолдана алмайтындар мансап орталықтары мен ХҚКО-лардың өзіне-өзі қызмет көрсету аймақтарына барып өтініш бере алады.

№5. Қаражатты қайда жұмсауға болады?

Грант қаражатын мына нәрселерді сатып алуға жұмсауға болады:

құрал-саймандар мен еңбек құралдарын; технологиялық жабдықтарды; мал, құс, көшет, тұқым сатып алуға; орын-жайды жалға алуға жұмсауға болады.

№6. Грант қаржысын қандай мақсатта жұмсауға болмайды?

Мына мақсаттарға жұмсауға болмайды:

тұтынушылық мақсаттарға; несиелерді өтеуге; жылжымайтын мүлік сатып алуға немесе салуға; жер учаскесін алуға; акцизделетін өнімдер өндіруге берілмейді.

№7. Комиссия қалай шешім қабылдайды?

Грант иегерлерін Еңбек мобильділігі орталықтары жанындағы аудандық немесе қалалық комиссиялар анықтайды. Үміткерлер өз бизнес-жобасын комиссия отырысында таныстырады.

Комиссия бизнес-жобаларды мынадай критерийлер бойынша бағалайды:

бизнес-идеяның бәсекеге қабілеттілігі; өткізу нарығының нақты жоспарлануы; жобаның қаржылық өміршеңдігі; кәсіпкерлік дағдылардың деңгейі; жаңа жұмыс орындарын құру әлеуеті.

№8. Жұмсалған қаражат туралы есеп беру қажет пе?

Иә, есеп беру қажет. Комиссия шешімі үміткердің порталдағы жеке кабинетіне жіберіледі. Оң шешім қабылданған жағдайда, қатысушы банк деректемелерін ұсынады, шартқа қол қояды және қаражаттың жұмсалуы туралы есепті тоқсан сайын электронды түрде тапсырады.

Барлық процесс онлайн форматта, Еңбек мобильділігі орталықтарына бармай-ақ жүргізіледі.