Қоғамда ерлердің басындағы дағдарыс туралы айтылмайды . Драмеди жанрындағы 14 күн фильмі не туралы

Табысты, ақшасы көп кәсіпкер Дарханның өмірінде бәрі бар болып көрінгенімен, шын мәнінде жанында жақын адамдары мен шынайы достары жоқ. Ақша тауып, табысқа ұмтыламын деп жүргенде бала күннен бірге өскен достарынан қол үзіп қалады. Олардың басын қосып, бірге ақыт өткізу үшін Дархан тәуекелге бел буады. Осылайша үш дос бала күнгі армандары мен орындалмай қалған тілектерін орындау үшін ессіз сапарға аттанады.

Информбюро тілшісі драмеди (драма және комедия) жанрындағы "14 күн" фильмін алғашқылардың бірі болып тамашалап, түсірілім тобымен сұхбаттасты.

Фильмнің режиссері – Олжас Нұрбай. Басты рөлдерді танымал актерлер Әбілмансұр Серіков, Әшім Ахметов, Қанат Тасхан, Гүлназ Жоланова, Мақпал Исабекова және Сабина Мовлаева сомдайды.

Кейінгі уақытта көзге түсіп жүрген режиссер Олжас Нұрбай түсірілімге кірісер алдында актерлерді таңдау оңайға соқпағанын айтты. Әу баста кейіпкерлер 40-45 жаста болған, алайда режиссер өзімен қатар болсын деп 35-40 жасқа түсірген. Режиссер бұл ностальгияға толы фильм екенін, кейіпкерлер өзімен қатарлас болғандықтан олардың көңіл-күйі, сағынышы жанына жақын болғанын айта кетті. 

"Режиссурада ең басты дүние – шынайылық. Ал шынайылық болу үшін өзіңе жақын дүние, өзіңнің тәжірибең болуы керек. Сондықтан ештеңені ойдан шығармадым, әр кейіпкердің ішінде өзім болдым. Жасын түсіргеннен кейін актерлерді таңдай бастадық. Қанат Тасханмен бірінші жұмыс істедім. Қанат түскен фильмдерді көргенде оның өнері ұнайтын. Бір-екі отырыстан көргенде бірегей, болмысы бөлек екенін байқадым. Қанатты бірінші бекіттік. Адамдар "бәрі сол баяғы актерлер" дейді. Бірақ Мансұр да, Әшім де, Қанат та – ТОП актерлер. Жігіттерге рөл сомдауды үйрету мақсатым болған жоқ. Тек қана бағыт беріп отырдым. Өмірдегі достарым болғандықтан бір-бірімізді бірден түсіндік. Импровизация көп болды, себебі шабысы бөлек жігіттерге еркіндік беруге тырыстым. Олардың шабысын тоқтатуға болмайды, тек бағыт беру керек. Бұл да тәжірибемен келетін дүние", – деді Олжас Нұрбай.

Фото: фильм трейлерінен скриншот

Режиссер "14 күн" фильмі өзіне де әсер еткенін, себебі мұнда еркектің басындағы дағдарыс бейнеленетінін айтты. 

"Сағынасың. Түсіме туған мектебім, сол жақтағы достарым жиі кіреді. Жылы үйде оянған сияқты боламын. Отыздан асып, қырыққа таяған соң өткеніңді бағамдап, өзіңе есеп бересің. Бұл – еркектің басындағы дағдарыс туралы фильм. Біздің қоғамда еркектің жан дүниесі туралы айтылмайды. Соның ақырын шет жағасын ашуға тырыстық. Тек еркектердің мәселесін ғана қозғамай, әйелдерге де қызық болсын дедік. Сондықтан бұл отбасымен бірге көретін фильм", – деді ол. 

Картинадан көрермен танымал блогер Сабина Мовлаеваны да көре алады. Режиссерден мұның маркетинг тәсіл емес пе екенін сұрадық. 

"Атағы бар, медиада жүрген, тәжірибелі, түр-әлпеті келіскен қыздарды іздегенде бес саусаққа да жетпеді. Бізде актер көп дейді, шындап келгенде өте аз. Сабина менің "Бажа" сериалында ойнапты. Сабина – барын салатын, деңгейін білетін, өте жайлы актриса. Маркетинг жағы да бар, ол да маңызды. Кім не десе де Сабинаны өте еңбекқор қыз деп білемін", – деді Олжас Нұрбай.

Әнші Мақпал Исабекова бұл фильмде үш достың бірі Ернаттың жұбайының рөлін сомдаған. Мақпал киноға түсуді қайта қолға алып, фильмге жиі түсе бастаған.

Фото: фильм трейлерінен скриншот

"Менің кейіпкерімнен көп әйел өзін танитын сияқты. Сәуле алғашқы сахнада көрінгендей ұрысқақ емес. Ол – жұмыстан, күйбең тіршіліктен шаршаған әйелдің бейнесі. Күйеуі түсінбейтін, бәрін өзі арқалап алған әйел сондай болып қалады. Ал фильм соңында күйеуі жұмыс істеп, өзін қолға ала бастағанда Сәуле де өзгерді. Сондықтан әйел адамға арқасүйер ер азамат керек. Бұл кейіпкердің болмысын маған жақын деп те, алыс деп те айта алмаймын. Мен шаршаған әйелдің бейнесін көрсетуге тырыстым. Шымкентте, енді, міне, Алматыда жабық көрсетілім болды. Шымкентте қарқылдап күлсек, бүгін көз жасқа ерік беріп жыладық. Меніңше, күшті фильм шыққан, маған қатты ұнады. Рөлім аса бір ауқымды болмаса да, маған әсер қалдырды", – деді Мақпал Исабекова жабық көрсетілімнен кейін.

Көрермендер бұл фильмнен әнші Мадина Сәдуақасованы да көре алады. Фото: фильм трейлерінен скриншот

Көрерменнің көзайымына айналған Әшім Ахметов түсірілім кезінде ипровизация көп болғанын айтып отыр.

"Бала кезден бірге өскен, бірге ойнап, бірге таяқ жеген, бірге алма ұрлап, бірге неше түрлі бұзықтық істеген үш достың біраз уақыттан кейін кездесіп, бірге уақыт өткізгені туралы фильм, ностальгия деп айтсақ та болады. Отбасы, достық, махаббат тақырыбы бар. Сондықтан көрермен бұл туындыдан өзіне керек дүниені табады деген ойдамын. Импровизация көп болды. Бір-бірімізге қалжыңдап, аяқ асты бірнәрсе қосып жібереміз. Оны екіншіміз іліп алып, үшіншіміз жалғап отырды. Мысалы, кейіпкерімнің тұтығып қалатыны сценарийде болған жоқ. Бір жерде сәтті шығып кеткен соң ары қарай қосып отырдық. Әр рөлден жаманнан жиреніп, жақсысын алуға тырысамын. Осы фильмге түскен соң ескі достарыма хабарласып, кездескім келді. “14 күн” көрерменнің көңілінен шығатынына сенемін", – деді актер.

Фильм аяқталған соң көрермендер орнынан тұрып, қол шапалақтап, түсірілім тобына қошемет көрсетті.