"Қағаз, қаламды өзіміз сатып аламыз". Семейде көлік колледжінің мұғалімдері бірнеше айдан бері жалақы ала алмай жүр

Семей қаласындағы көлік колледжінің ұстаздары бірнеше айдан бері жалақы төленбеуіне байланысты жұмысқа қатынауда қиындыққа тап болғанын айтып, құзырлы органдардан көмек сұрайды. Ұжым өкілдерінің айтуынша, жолақыға қаражат табу мұңға айналып, қарызға белшеден батқан, деп хабарлайды 31-арнаның "Информбюро" ақпараттық агенттігі. 

Колледжде еңбек ететін жүзден астам қызметкер маңдай тер ақының уақытылы төленбеуі салдарынан тұрмыстық қиындықтарға ұшыраған. Мұғалімдер тек жалақысыз қалмай, оқу процесіне қажетті кеңсе тауарларын да өз қаражатына сатып алуға мәжбүр болып отыр.

Колледж қызметкерлерінің айтуынша, жұмысқа келіп-кету де үлкен мәселе. Қарызға ақша сұраудан қажыған ұстаздар күнделікті шығындарын жаба алмай отырғанын жеткізді.

"Қазір күн сайын баға өсіп жатыр, ал жалақымыз әлі де төмен. Бір айдан екінші айға жетпейді. Соның өзін бірнеше айдан бері бермей отыр. Оған қоса кеңсе тауарларына бөлінетін қаржы жоқ. Қағазды, қаламды өзіміз сатып аламыз, принтерлерді де өзімізге толтырамыз", – деді колледж мұғалімі Жанар Қаржаубаева.

Мемлекеттік оқу орнының қаржылық жағдайы жылдан-жылға қиындап бара жатқанын айтқан ұстаздар мардымсыз айлықтың кешіктірілуі жиілеп кеткенін алға тартады. Соның салдарынан жұмысқа деген ынта да төмендеген.

"Бізде жалақының кешіктірілуі үйреншікті жағдайға айналды. Бұл жолы тіпті ұзаққа созылды. Бала-шағамыз бар, күнделікті несиелеріміз бар. Балаларымыздың оқу ақысын төлей алмай отырмыз. Көп несиеміз мерзімінен асып кетті", – деді колледж мұғалімі Жадыра Жұмаділова.

Оқи отырыңыз: 70 мыңға жуық педагог тегін біліктілікті арттыру курсынан өтті

Аталған колледжде техник, автомеханик, слесарь сынды мамандықтар бойынша білім алатын студенттер де бірнеше айдан бері шәкіртақы алмай жүр. Мұғалімдер мен студенттердің мәселесіне қатысты Абай облысы білім басқармасының өкілдері жағдайдың жақын күндері шешілетінін мәлімдеді.

"Шәкіртақы бойынша облыс көлемінде қараша-желтоқсан айлары үшін қарыз бар. Қазір мәслихат тарапынан қаржы бөлінді. Қаражат қазынашылықтан өткен соң толық көлемде төленеді. Ал еңбекақыға қатысты көлік колледжі бойынша қаражат бөлінді, 20-сыншы күнге дейін аударылады", – деді Абай облысы білім басқармасының бөлім маманы Аян Әлімғазиев.

Қазіргі таңда аталған колледжде 952 студент білім алады, ал техникалық қызметкерлерді қоса есептегенде жүзден астам адам еңбек етеді. Ұжым мемлекеттен бөлінетін қаражаттың жыл сайын кешіктірілуі қалыпты жағдайға айналғанын айтады.

"Егер бұл мәселе жүйелі түрде шешілмесе, білікті мамандардың азаюына және оқу процесінің сапасына кері әсерін тигізуі мүмкін", – деді тілші Динара Ерболқызы.

Оқи отырыңыз: Тегін цифрлық платформа: Мұғалім балалардың оқу үлгерімін қалай онлайн бақылай алады

Ұстаздар бұл жағдайға бейжай қарамай, салалық министрлік тарапынан аудит жүргізіліп, қаржыландыру тетіктері қайта қаралуы тиіс деп есептейді.