"Кеудемді мақтаныш кернеді". Қол күресінен бірнеше дүркін әлем чемпионын жеңген қазақ қызы кім

Биыл қыркүйек айында 16 жастағы Ұлболсын Елмұрат Болгарияда армрестлинг, яғни қол күресінен өткен  әлем чемпионатында сенсация жасады. Ол 60 келіге дейінгі салмақ дәрежесінде өнер көрсетіп, финалда 13 дүркін әлем чемпионы словакиялық Лусия Дебранованы жеңді. 

Ұлболсын – армрестлинг саңлақтары шыққан мекен Шардараның тумасы. Биыл сәуірде өткен ел чемпионатында "Шардара Армспорт" құрамасы 25 алтын медаль жеңіп алып, жалпыкомандалық есепте топ жарды. Олардың арасында жасөспірімдер сапында өнер көрсетіп, алтын медаль алған Ұлболсын да бар.

Осы орайда Информбюро порталы ересектер арасындағы алғашқы жарысына қатысып, әлем чемпионы атанған Ұлболсын Елмұратпен аз-кем сұхбаттасты. 

– Ұлболсын, қайда туып өстіңіз. Қол күресті таңдауыңызға не себеп болды?

– Шардара қаласында туып өстім. Спортқа 12 жасымнан қызығып, осы қол күреске қатыса бастадым. Сол кездері интернет желісінен, әлеуметтік желілерден қол күрескен спортшы қыздарды көріп, неге байқап көрмеске деп ойладым. 

– Биыл 13 дүркін әлем чемпионы словакиялық Лусия Дебранованы жеңіп, сенсация жасадыңыз. Жалпы финалдағы ғана емес, әр қарсылас оңай емес қой. Чемпионатқа қалай дайындалдыңыз? Финал алдында уайым болмады ма? 

– Әлем чемпионатына өте қатты дайындалдым. Өзім "Шардара Армспорт" клубында жаттығамын. Осал тұсымды күшейтуге күніне төрт сағатымды арнадым. Қарсыласыммен қол күрескенде қобалжыдым, бірақ оны еңсеріп, финалда жеңіп шықтым. 

Финал алдында ата-анамның, "жаттықтырушымның үмітін ақтай аламын ба?", "ұтылып қалсам ше?" деген ой маза беимеді. Соған қарамастан, финалда жеңіп шықтым. 

Қарсыласымды жеңу оңайға соқпады. Жаттықтырушыларымның айтқан тәсілдерін қолданып жеңіп шықтым. Жеңген сәтте ішімдегі бар эмоция сыртқа шығарып, өте керемет әсер алдым.

Фото Ұлболсын Елмұраттың жеке архивінен алынды

– Сіз 16 жасыңызды ересектер арасында әлем чемпионы атандыңыз. Алғаш рет осындай ірі жарысқа қатыстыңыз ба? Әлде бұған дейін де үлкен ареналарда ел намысын қорғап жүрсіз бе? 

– Жоқ, бұған дейін жасөспірімдер арасында өткен Қазақстан, Азия, Әлем чемпионаттарында ел намысын қорғадым. Бұл әлем чемионаты – ересектер арасында күрескен алғашқы жарысым.

– Жасөспірімдер арасында қандай жетістіктерге жеттіңіз?

– Жасөспірімдер арасында Қазақстан чемпионы, Азия чемпионы, Әлем чемпионы және Әлем кубогы иегерімін.

– Армрестлинг спортында не маңызды? Білектің күшін қалай жаттықтырасыздар? 

– Қол күресте ең маңыздысы ол – шыдамдылық, мінез, күш-қайрат қажет. Біз бірінші қыздырынып аламыз да, содан соң жаттығамыз. Күнде төрт сағат жаттыққан соң бабымда болып, үзбей жаттығудың арқасында әлем чемпионы атанып отырмын.

– Әлем чемпионатынан кейін сіз туралы медиа жарыса жазды. Жеңісіңізді сенсация деп хабарлады. Сіз өзіңіз бұл жеңісіңізді қалай қабылдадыңыз? Чемпионаттан кейін өміріңіз өзгерді ме? 

– Шынымды айтсам, жеңіс маған үлкен жауапкершілік жүктеді. Кеудемді қуаныш пен мақтаныш кернеді. Халықтың ықыласын сезініп, бұл мені алға ұмтылуға жігерлендірді. Өмірде жаңа мүмкіндіктер ашыла бастады. 

Фото Ұлболсын Елмұраттың жеке архивінен алынды

– Сіз әлі мектепте оқиды екенсіз. Спорт пен сабақты қатар алып жүру қиын емес пе? Қандай мамандық таңдап жатырсыз?

– Спорт пен сабақты алып жүру қиындық тудырып жатқан жоқ. Екеуіне де шамасы жететін адамға қиын емес деп ойлаймын.

Заң саласына қызығып жүрмін, бірақ спортты оқумен қатар алып жүргім келеді.

– Қандай арман-мақсатыңыз бар?

– Мектепте жүріп өзімді дамытып жүрмін. Армандарымның бірі – әлемнің ең мықты спортшыларының қатарында болу. Сонымен қатар болашақта жастарға шабыт беретін тұлға болғым келеді.

Сөз соңында осындай дәрежеге жеткізген алғашқы ұстазым – Арман Қарсыбаевқа және жаттықтырушым Меруерт Қалықұловаға алғыс айтамын.
Әр жеңісімнің артында осы кісілердің еңбегі тұр. Бұл жалғыз менің ғана емес, олардың да жеңісі деп білемін.