1200 ге жуық мүмкіндігі шектеулі жан емдік және психологиялық көмек алды

Түркістан облысында 100 мыңға жуық мүмкіндігі шектеулі жан тұрады. Бұл облыс халқының 5%-ын құрайды. Бұл орайда өңірде мүмкіндігі шектеулі жандарға бірнеше оңалту орталығы әлеуметтік қызмет көрсетіп келеді, деп жазады Egemen.kz.

Солардың бірі – Сауран ауданы Оранғай ауылында орналасқан,  200 орындық «Самғау» оңалту орталығында арнаулы әлеуметтік қызметтердің 8 түрі көрсетіледі. Республика күніне және орталықтың құрылғанына бір жыл толуына орай «Өмірді сүйген жүректер» тақырыбында салтанатты іс-шара ұйымдастырылды. Шараның ресми бөлігінде мекеме директоры Гүлнұр Сауртаева атқарылған жұмыс барысы туралы баяндады. Сондай-ақ, қонақтар назарына қызмет алушылардың түрлі бағыттағы емдік-сауықтыру және әлеуметтік бейімдеу жұмыстарының нәтижелері арнайы бейнеролик арқылы көрсетілді. Арнаулы әлеуметтік қызмет алушылар мен орталық мамандарының қатысуымен концерттік бағдарлама көрермен назарына ұсынылды. Көпшілік ерекше жандардың өмірге деген құштарлығын, жігері мен табандылығын сезініп орталық ұжымының еңбегіне табыс тіледі.

Орталық ашылған уақыттан бері 160 қызметкер мүмкіндігі шектеулі жандарға оңалту қызметтерін көрсетіп, олардың әлеуметтік белсенділігін арттыруға бағытталған кешенді жұмыстар атқарып келеді. Бір жыл ішінде 1200-ге жуық қызмет алушы емдік және психологиялық оңалту шараларынан өтіп, өмір сапасын жақсартуға мүмкіндік алған.

Түркістан облысы