15 немересі және 25 шөбересі бар : Қазақстандағы ең қарт тұрғын Түймегүл Темірбаева 116 жасқа толды

Ұлытау облысының тұрғыны Түймегүл Темірбаева биыл қаңтар айында 116 жасқа толып, Қазақстандағы ең қарт тұрғын атанды, – деп хабарлайды Aikyn.kz сайты.

Өмірін отбасыға арнаған Түймегүл әженің айтуынша, ұзақ өмір сүрудің басты сыры – еңбекқорлық пен жақын адамдарға деген сүйіспеншілік.

Түймегүл әженің 15 немересі және 25 шөбересі бар. Ол өмір бойы отбасының тірегі болып, балалар мен немерелеріне үлгі көрсетіп келген. Туыстарының айтуынша, әже денсаулығына ешқашан шағым айтпаған, әрдайым белсенді және үй ішіндегі іс-шараларға қатысады.

Келіні Раушан Темірбаева: "Бір орында ұзақ отырмайды, үй ішінде жүріп-тұрады, кейде аулаға шығады. Тіпті бізге көмектесіп, тамақ дайындайды. Бос отырғанды ұнатпайды", – дейді.

Ұзақ жасаған Түймегүл әже: "Балаларым, немерелерім, шөберелерім жанымда болғанына қуаныштымын. Бар ойым – олардың амандығы мен бақыты", – деп бөлісті.