2026 жылы Алматыда жастарға арналған жаңа жоба іске қосылады

Алматы қаласы жастар саясаты басқармасының мәліметінше, келесі жылы мегаполисте «Жастар бюджетке қатысуы» жобасын жүзеге асыру қарастырылған.

Бастаманың мақсаты – жастардың азаматтық белсенділігін арттыру әрі қаланың дамуына тікелей қатысуына жағдай жасау.

– Жобаға 14 пен 35 жас аралығындағы Алматы қаласының тұрғындары ғана қатыса алады. Әр қатысушы тек бір жобаны және бір бағыт бойынша ғана ұсына алады. Жоба қоғамдық орындарда жүзеге асырылуы тиіс және қалалық әкімдік құзырындағы салаларға сәйкес келуі қажет, - деп хабарлады басқармадан.

Ведомство мәліметінше, «Жастардың бюджетке қатысуы» жобасы 5 негізгі кезеңге бөлінеді: 

1. Өтінім қабылдау. Жобаға қатысқысы келетін жастар jasalmaty.kz онлайн-платформасы арқылы жеке кабинет ашып, өз идеяларын жоба ретінде тіркейді. Жоба сипаттамасы, бюджет есебі, визуалды материалдар жүктеледі.

2. Сараптамалық бағалау. Арнайы комиссия жобаларды бағалайды. Комиссия құрамында: жастар саясаты басқармасы, мемлекеттік органдар өкілдері, ҮЕҰ және жастар белсенділері болады. Жоба әлеуметтік маңыздылығына, іске асыру мүмкіндігіне ,ауқымдылығына қарай бағаланады.

3. Дауыс беру. Жобалар онлайн дауыс беру кезеңіне өтеді. Алматы қаласының 14–35 жас аралығындағы жастары ғана дауыс бере алады. Әр қатысушы 3 түрлі жобаға дейін дауыс бере алады. Аутентификация ЭЦҚ немесе SMS-код арқылы жүргізіледі.

4. Жобаларды іске асыру. Жеңімпаз жобалар мемлекеттік әлеуметтік тапсырыс аясында жүзеге асырылады. Жобаларды жеке және заңды тұлғалар іске асыра алады.

5. Мониторинг. Іске асқан жобалар тұрақты түрде бақыланып, қоғамдық бақылауға алынады. Оған авторлар, жастар кеңестері, мемлекеттік орган өкілдері және қоғам өкілдері қатысады.

– Жоба – жастарға өз идеяларын нақты іске асыруға мүмкіндік беретін тиімді тетік. Ол арқылы жастар тек жоба ұсынумен шектелмей, қаланы басқаруға белсенді қатысады, - деп мәлімдеді ведомство.

Еске салайық, 2020 жылы елімізде «Халық қатысатын бюджет» жобасы іске қосылды. 

Былтыр Алматыда «Халық қатысатын бюджет» бағдарламасына 6 мыңнан астам өтініш түскен.