Айыппұлдан қашқан жүргізушілер 28 фураны жол жиегіне тастап кеткен

Оқиға республикалық «Жол қауіпсіздігі» акциясы аясында болды. Автожолда көлік инспекциясы, полиция және арнайы мақсаттағы жасақ қызметкерлері бірлескен бақылау бекетін ұйымдастырған.

Алдын ала мәлімет бойынша, жүргізушілер рұқсат етілген салмақтан асып кеткені үшін салынатын ірі айыппұлдан қауіптеніп, жүк көліктерін тастап кетуді жөн көрген.

Қалдырып кеткен көліктердің 24-і Петропавл әуежайына бұрылатын жол бойында, тағы төртеуі «Оңтүстік» бақылау бекетінің маңында қалған.

Кейбір тасымалдаушылар салмақ өлшеу бекетін әуежай аумағы арқылы өтетін ауылішілік жолдармен айналып өтпек болған. Алайда мұндай үш жүргізуші ұсталды.

Қазақстанда ауыр жүк көліктеріне уақытша шектеу енгізілді

Солтүстік Қазақстан облыстық жолаушылар көлігі және автомобиль жолдары басқармасының басшысы Ерден Шортыбаевтың айтуынша, көптеген жүк көлігі иелері байланысқа шықпай, техникаларын алып кетуге әрекет жасап жатқан жоқ.

Осыған байланысты жергілікті билік көліктерді мәжбүрлі түрде эвакуациялау үшін сотқа талап-арыз дайындап жатыр.

Полицияның мәліметінше, бақылау бекеті әрбір жүк көлігі ресми түрде өлшенгенге дейін тәулік бойы жұмысын жалғастырады.

Қазақстанда артық жүкпен жүргені үшін айтарлықтай айыппұл қарастырылған. Жеке кәсіпкерлерге рұқсат етілген салмақ 1–5 тоннаға асса – 40 АЕК, 5–10 тонна аралығында – 80 АЕК, ал 10 тоннадан артық болса – 120 АЕК көлемінде айыппұл салынады. Орта және ірі бизнес субъектілері үшін бұл айыппұл мөлшері бұдан да жоғары.

Ал тасымалдаушылардың айтуынша, қолданыстағы салмақ шектеулерін толық сақтаған жағдайда көптеген рейс экономикалық тұрғыдан тиімсіз болып қалады. Сондай-ақ олар мобильді салмақ бақылау бекеттерін қалалардың кіреберісіне емес, жүкті тиеу орындарына орналастыру қажет деп есептейді. Олардың пікірінше, қазіргі тәжірибе жолдағы құқық бұзушылықтың алдын алудан гөрі айыппұл салуға көбірек бағытталған.