Әкімдік ақтөбеліктердің Наурыз мерекесімен кенеттен құттықталуын түсіндірді

Қазандағы Наурыз – Ақтөбе облысындағы Алға тұрғындары күтпеген жерден осындай құттықтауды көрді. Көктемгі баннерді ешкім уақытынан бұрын көрсетуді жоспарламаған болып шықты: оны қатты жел кездейсоқ "ашып жіберген", деп хабарлайды Tengri Life.

Алға қаласының тұрғындары ерекше құттықтауды байқап, оны әлеуметтік желілерде қызу талқылай бастады. Көктемге әлі жарты жылдай уақыт болса да, қала көшелерінің бірінде Наурыз мейрамына арналған мерекелік баннер пайда болған.

Instagram-дағы бұл жарияланымды көру

Алга Объявление (@alga_obyavleniya) жарияланымы

Жергілікті әкімдік бірден жағдайға қатысты түсініктеме берді. Наурыз мейрамына арналған мерекелік баннер басқа кенептің астында жабулы тұрғаны белгілі болды. Қатты желдің салдарынан үстіңгі баннер ашылып кетіп, көктем мерекесімен құттықтау жазуы жұртшылық назарына іліккен.

"Осыдан бір сағат бұрын желдің екпінінен аталған нысандағы жоғарғы баннер ашылып кеткен. Қазір зақымданған кенеп алынып, баннер қалқаны ретке келтірілді", – деп хабарлады Алға ауданының әкімдігі.

Әкімдіктегілер құттықтау кездейсоқ көзге түскенін айтады.

Дегенмен, бұл Ақтөбе облысында жергілікті экран өз күнтізбесімен жұмыс істеп кеткен алғашқы жағдай емес. Былтыр Қандыағаш тұрғындарын жаздың ортасында Жаңа жылмен "құттықтаған". Қала орталығындағы LED-экранда жаңажылдық құттықтау көрсетілді. Сол кезде Мұғалжар ауданының әкімдігі болған жайтты бағдарламалық жасақтамадағы ақаумен түсіндірді.

Бізді Google-дың негізгі дереккөздер тізіміне қосыңыз