Әлеуметтік қызметтер порталында оңалту құралдарының сапасына бақылау күшейеді

Еңбек және халықты әлеуметтік қорғау министрлігі мүгедектігі бар адамдарды техникалық оңалту құралдарымен қамтамасыз ету жүйесін жетілдіру бойынша бұйрық жобасын әзірледі.  «Ашық НҚА» порталында орналастырылған құжат рәсімдердің ашықтығын және ұсынылатын тауарлардың сапасын арттыруға бағытталған, – деп хабарлайды Aikyn.kz. 

Басты жаңашылдықтардың бірі – Әлеуметтік қызметтер порталын Ұлттық тауарлар каталогымен біріктіру. Енді барлық өнімге бірегей сәйкестендіру коды беріліп, міндетті тіркеуден өтетін болады. Бұл әрбір бұйымның өнім берушіден нақты алушыға дейінгі жолын қадағалауға мүмкіндік береді. Бірыңғай есепке алуды енгізу жалған мәмілелердің жасалу мүмкіндігін азайтып, нарықты сертификатталмаған және сапасыз тауарлардың түсуінен қорғайды.

Бұйрық жобасында көру қабілеті төмен азаматтар үшін платформаның қолжетімділігін арттыруға ерекше назар аударылған. Осыған орай міндетті талап енгізіледі: тауарды Порталға жіберу кезінде арнайы комиссия фотосуреттерге егжей-тегжейлі мәтіндік сипаттаманың болуын тексеретін болады. Пайдаланушылар кедергісіз дұрыс таңдау жасай алуы үшін онда бұйымның мақсаты, функционалы және техникалық сипаттамалары нақты жазылуы тиіс.

Сонымен қатар  бюджет қаражатын неғұрлым ұтымды пайдалану үшін мүгедектігі бар адамдарды гигиеналық құралдармен (жөргектермен) тоқсан сайын қамтамасыз ету туралы норма бекітіледі. Ведомство ұсынылатын құралдардың жалпы кепілдендірілген жылдық көлемі өзгеріссіз қалатынын баса айтады.

Бұйрық жобасы Еңбек министрлігінің қолданыстағы нормаларын Мүгедектігі бар адамдарды автомобиль көлігімен тасымалдау (инватакси) қызметтерін көрсету қағидаларына қатаң сәйкестендіреді.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.