“Әлі күнге дейін жауап алған жоқпыз“. Сәуле Базарханның отбасы жаңа мәлімдеме жасады

Блогер әрі кәсіпкер Сәуле Базарханның отбасы жаңа мәлімдеме жариялап, клиника өкілдерінің сұхбатынан кейін туыстарының 15 мамырдағы оқиғаға қатысты сұрақтары тіпті көбейе түскенін айтты. Отбасы атынан жазбаны Сәуленің ұлының жұбайы Әлдия жариялады, деп хабарлайды Tengri Life.

Блогер әрі кәсіпкер Сәуле Базарханның отбасы жаңа мәлімдеме жариялап, клиника өкілдерінің сұхбатынан кейін туыстарының 15 мамырдағы оқиғаға қатысты сұрақтары тіпті көбейе түскенін айтты. Отбасы атынан жазбаны Сәуленің ұлының жұбайы Әлдия жариялады, деп хабарлайды Tengri Life.

Ол жазбаға клиника өкілінің сұхбатынан видеоүзінділер мен отбасының айтуынша, 19 мамырдағы хат алмасулар скриншоттарын тіркеген.

Туыстары өз мәлімдемесінде "Анықтаймыз" бағдарламасында айтылған клиника директорының сөзіне пікір білдірді. Ол кезде медициналық мекеме өкілі қайғылы оқиғадан кейін "бүкіл ұжым ауыр эмоционалдық күйде болғанын", сол себепті кейбір пациенттерге клиниканың жұмысын тоқтатқаны туралы уақтылы ескертіп үлгермегендерін айтқан болатын.

"15 мамырдан бастап клиника іс жүзінде жұмысын тоқтатты, пациенттерді қабылдау мен жазылу тоқтатылды. Кейбір пациенттерге уақтылы әрі толық хабарлай алмағанымызды мойындаймыз және сол үшін кешірім сұраймыз. Ол сәтте бүкіл команда ауыр эмоционалдық күйде болды. Пациент ота алдындағы қажетті дайындық пен тексерулерден өтті. Өкінішке қарай, қабылданған шараларға қарамастан, ешқайсымыз дайын болмаған қайғылы жағдай болды", - деді ол.

Алайда отбасы мүшелері қолдарында хат алмасулар бар екенін, оған сәйкес қайғылы оқиғадан кейін бірнеше күн өтсе де, клиника өкілдері әлеуетті клиенттермен байланысын үзбегенін алға тартады.

"Бізде 19 мамырдағы хат алмасулар бар. Онда клиника өкілдері жаңа клиенттермен сөйлесуді жалғастырып, баға тізімін жіберіп, онлайн-кеңестер ұсынып, келесі аптаға ота жасауды талқылап отырған", - делінген мәлімдемеде.

Туыстарының айтуынша, хабарламаларда клиникада жөндеу жұмыстары жүріп жатқаны, сондықтан кеңестер онлайн форматта өткізілетіні де айтылған.

Скриншот: Threads

Мәлімдемеде қайғылы оқиға болған күні туыстарының бірі клиникада болып, отаның аяқталуын күткені бөлек айтылады. Отбасының сөзіне қарағанда, оған не болып жатқаны туралы ешқандай ақпарат берілмеген.

"Команда "ауыр эмоционалдық күйде" болғаны соншалық, жанында күтіп отырған туысына бір ауыз сөз айта алмады ма? Бірақ жаңа клиенттерге жауап беріп, баға тізімін жіберіп, онлайн-кеңес өткізуге шамалары келді ме?" - дейді Сәуле Базарханның жақындары.

Скриншот: Threads

Сондай-ақ олар әйелдің қайтыс болғанын алғаш рет клиника өкілдерінен емес, басқалардан естігенін мәлімдеді.

"Өлім туралы алғашқы ақпаратты отбасы клиника өкілдерінен емес, келген жедел медициналық жәрдем қызметкерлерінен алды", - делінген жарияланымда.

Отбасының айтуынша, кешірім кейбір пациенттерге клиниканың жабылғаны туралы ескертіп үлгермегендері үшін ғана сұралған, алайда қайғылы оқиға күні туыстарына неге хабар берілмегені туралы түсініктеме әлі күнге дейін берілмеген.

Туыстары өз мәлімдемесінде клиника өкілдерінің "пациент ота алдында барлық қажетті тексеруден өтті" деген сөзіне де тоқталды.

"Клиника тексерулер жүргізілгенін, талдаулар тапсырылғанын, дәрігерлер анамыздың жағдайын зерттегенін мойындап отыр және оны отаға өздері жіберді. Дәрігерге баратын кез келген адам осыған сенеді. Біз ота қауіпсіз болуы үшін қажет деп сенгендіктен тексеруден өтіп, талдау тапсырамыз. Анамыз тексеруден өтіп, отаға рұқсат алды. Бірақ ота жасау бөлмесінен тірі шықпады", - делінген мәлімдемеде.

Бұл ретте туыстары жағдай қиындаған сәтте нақты қандай іс-қимылдар жасалғаны туралы сұрақтарға әлі де жауап алмағандарын баса айтады.

"Күрделі жағдай туындағаннан кейін нақты қандай шаралар қолданылды және оған кімдер қатысты?" - дейді Сәуленің балалары.

Үндеуде туыстары ресми тергеу аяқталғанға дейін болған оқиғаның себептері туралы саналы түрде ешқандай қорытынды жасамайтындары ерекше атап өтілген.

"Біз қауіпті жағдай нақты қай кезеңде туындағанын және одан кейін қандай әрекеттер жасалғанын кесіп айтпаймыз. Бұл біз үшін маңызды емес болғандықтан емес, осы уақытқа дейін отбасы бұл сұрақтарға жауап алмағандықтан айтпаймыз", - делінген жазбада.

Скриншот: Threads

Мәлімдеме соңында Әлдия сол күнгі оқиғаларға қатысты сұрақтарға жауап күтетінін атап өтті.

"Ол біздің анамыз еді. Немерелерінің сүйікті апасы болатын. Біз клиникаға жоспарлы ота жасатуға келген адамның үйіне неге оралмағанын түсінгіміз келеді", - деп жазды ол.

Қазіргі уақытта тергеу жалғасып жатыр. Қайғылы оқиға себептері мен оқиғалар желісі туралы ресми қорытынды әлі жарияланған жоқ.

Еске сала кетейік, бұған дейін марқұмның келіні Сәуле Базархан 15 мамырда Алматыдағы жекеменшік клиникалардың бірінде жергілікті анестезиямен жасалған жоспарлы липосакция операциясынан кейін көз жұмғанын айтты. Оның сөзінше, отадан кейін бірнеше сағат бойы туыстарына пациенттің жағдайы туралы ақпарат берілмеген, ал өлімі туралы кейін хабарлаған.

Сәуле Базарханның қазасынан кейін клиника мәлімдеме жасаған болатын.

Алматы Полиция департаменті Бостандық аудандық полиция басқармасы қылмыстық іс қозғағанын мәлімдеді. Қазір тергеу жүріп жатыр, оның нәтижесі бойынша түпкілікті процессуалдық шешім қабылданады.

Сәуле Базархан - танымал қазақстандық блогер әрі кәсіпкер. Әлеуметтік желілерде ол миллионнан астам оқырманы бар Сәуле Ермаханова ретінде танымал болатын. Базархан өз парақшаларында отбасы, бизнес, саяхат және жеке өмірі туралы бөлісетін.

Google News арқылы жаңалықтарымызды қадағалаңыз