Алматы облысында автобус пен көлік соқтығып, бір адам мерт болды

Облыстық полиция департаментінің мәліметінше, жол апаты Алматы – Винсовхоз – Чапай автожолының 15-шақырымында болған. Chevrolet Nexia автокөлігін басқарған 24 жастағы жүргізуші рульді игере алмай, қарсы бағытқа шығып кетіп, алдымен автобуспен, кейін Chery Tiggo автокөлігімен соқтығысқан.

- Жол-көлік оқиғасы салдарынан Chevrolet Nexia жүргізушісі алған жарақаттарынан оқиға орнында көз жұмды. Оның екі жолаушысы, сондай-ақ Chery Tiggo автокөлігінің жүргізушісі әртүрлі дене жарақаттарымен медициналық мекемеге жеткізілді, - деп хабарлады департаменттен.

Полиция бұл дерек бойынша қылмыстық іс қозғады. Қазір болған оқиғаның барлық мән-жайын анықтауға бағытталған сотқа дейінгі тергеу жүргізіліп жатыр.

Еске салайық, бұған дейін Астанадағы жол апатынан екі адам қаза тапты.