Алматы облысында көлік тұрғын үй ауласында екі баланы қағып кетті

Алматы облысының Бесағаш ауылында Chevrolet Cobalt жүргізушісі тұрғын үй кешенінің ауласында екі баланы қағып кетті, – деп хабарлайды Aikyn.kz сайты. 

Жол-көлік оқиғасы 4 қыркүйек күні сағат 18:20 шамасында Талғар ауданына қарасты Бесағаш ауылындағы «Нұрия» тұрғын үй кешенінің аумағында болған.

Куәгерлердің айтуынша, оқиғадан кейін зардап шеккендердің бірі – қыз бала біраз уақыт ес-түссіз жатқан. Жергілікті тұрғындар көлік шамамен 40 км/сағ жылдамдықпен жүруі мүмкін екенін айтады. Алайда бұл ақпаратты полиция әзірге растаған жоқ.

– Полиция қызметкерлері екі кәмелетке толмаған жаяу жүргіншіні қағып кеткен Chevrolet Cobalt көлігінің 25 жастағы жүргізушісін жауапкершілікке тартты. Жол-көлік оқиғасы 4 қыркүйекте сағат 18:20 шамасында Талғар ауданы Бесағаш ауылындағы «Нұрия» тұрғын үй кешенінің аумағында болды. Оқиға салдарынан балалар әртүрлі дене жарақатын алып, қажетті медициналық көмек көрсету үшін ауруханаға жеткізілді, – деп мәлімдеді Алматы облысының полициясы.

Полиция жүргізушілерге жол қозғалысы ережелерін қатаң сақтап, әсіресе тұрғын үйлердің ауласында барынша сақ болу қажеттігін ескертті.