Алматы облысында үздік 50 маман марапатталды

Мемлекет басшысы биыл ауыл шаруашылығы еңбеккерлерінің форумында саланы алдағы бес жылда екі есе өсіру міндетін қойған. Бұл мақсатқа жетуде Алматы облысының үлесі айрықша. 

Салтанатты жиында өңір шаруашылығына сүбелі үлес қосқан 50 маман марапатталды. Солардың бірі - Іле ауданындағы компания. Мұнда 800-ден астам ірі қара өсіріліп, сапалы өнім өндіру жолға қойылған.

Махан Төлемісов, «Генофонд» ЖШС басшысы:

- Бұл менің еңбегім ғана емес. Коллективтің еңбегі. Осы жетістіктерге жетіп, мал басын сақтап, көп өнім алып, сапалы өнім алып, осындай жетістіктерге жетіп жатырмыз.

Жиында облыс әкімі өндіріс көлеміндегі оң динамиканы атап өтті. Биыл аграрлық бағыттағы кәсіпорындар және қайта өңдеу саласы жалпы өңірлік өнімнің 26 пайызын қамтамасыз етті. Келесі қадам - егіс алқаптарын жарты миллион гектарға дейін ұлғайту және ірі инвесторларды тарту.

Марат Сұлтанғазиев, облыс әкімі:

- Мал шаруашылығында келешекте 280 млрд. теңгеге сегіз ірі инвестициялық жоба іске асырылады. «Молочная Долина» серіктестігінің 10 мың басқа арналған сүт фермасы, Еңбекшіқазақ ауданында «Каз Мясо» кәсіпорнының 10 мың тоннаға ет комбинаты, Жамбыл ауданынан 120 мың тоннаға «Aitas Kz» компаниясының құс фабрикасы бар. 

Салтанатты жиында экологияны қорғауға үлес қосқандар марапатталды. «Үлгілі ауыл» және «Таза Қазақстан» номинациялары бойынша да арнайы марапаттар табысталды.

Авторлары: Гүлім Советқан, Аят Дуйсембай, Аманжол Жөнкешов