Алматы облысында жаңбыр салдарынан апатты көпірді су шайып кетті

Алматы облысында Үлкен Алматы каналы бойындағы көлік жолында орналасқан пайдаланылмайтын көпірді су шайып кетті, деп хабарлайды Tengri Auto.

Облыс әкімдігінің мәліметінше, КВ-49 көлік жолының 54-шақырымындағы Түрген өзені арқылы өтетін көпір 2024 жылы апатты жағдайда деп танылған.

Осыған байланысты онда қозғалысқа шектеу қойылған болатын.

"Расында, 2026 жылғы 1 шілдеде нөсер жауын салдарынан Түрген өзеніндегі су деңгейі көтеріліп, нәтижесінде осы апатты көпір айналасындағы топырақты су шайып кеткені тіркелді", - деп атап өтті әкімдіктегілер.

Әкімдік апатты көпірді ауыстыру үшін жоба дайындалып, мемлекеттік сараптаманың оң қорытындысы алынғанын және тиісті қаражат бөлінгенін хабарлады.

Мемлекеттік сатып алу қорытындысы бойынша мердігер анықталды, ол жұмысқа осы айда кірісуі тиіс.

Еске сала кетейік, жақында нөсер жаңбырдан кейін Қаскелең шатқалындағы көпірді су шайып кеткен болатын.

Алматы облысы Төтенше жағдайлар департаменті жағдайға қатысты пікір білдірді.

"Таулы аймақтарда жауған нөсер салдарынан Қаскелең өзеніндегі су деңгейі күрт көтерілді. Қатты ағыс салдарынан экобекеттен шамамен үш шақырым жерде орналасқан "Искра" бау-бақша қоғамына баратын жолдағы көпір зақымдалды", – деп хабарлады ТЖД.

Бұған дейін Астанада көшелердің бірі жөндеу жұмыстарына байланысты ішінара жабылатыны хабарланған болатын.

Тағы оқыңыз: Алматыда Шымбұлаққа баратын жол инфрақұрылымды жаңартуға байланысты ішінара жабылады

Google News арқылы жаңалықтарымызды қадағалаңыз