Алматыда ағаштардың биіктігі 7 метрге дейін шектелуі мүмкін

Алматыда ағаштардың биіктігін шектеу ұсынылып жатыр. Ол бойынша, биіктік жеті метрден аспауы тиіс. Бұл мәселе қалалық ортаны дамыту және көгалдандыру тәсілдері аясында талқыланып жатыр, деп хабарлайды Tengrinews.kz.

Алматыда ағаштардың биіктігін шектеу ұсынылып жатыр. Ол бойынша, биіктік жеті метрден аспауы тиіс. Бұл мәселе қалалық ортаны дамыту және көгалдандыру тәсілдері аясында талқыланып жатыр, деп хабарлайды Tengrinews.kz.

Өңірлік коммуникациялар қызметі алаңында өткен брифингте Медеу ауданының әкімі Еркебұлан Оразалин мегаполисте қураған ағаштардың жиі құлауына қатысты сұраққа жауап бере отырып, экология басқармасы қазіргі уақытта Еуропада және кейбір басқа елдерде қабылданған стандарттарды қарастырып жатқанын айтты.

"Онда ағаш биіктігі 7 метрден аспауы тиіс деген нормативтер қолданылады. Алдағы орта мерзімді перспективаға келетін болсақ, қазір бұл мәселелер қалада қарастырылып жатыр. Соңғы шешімдер жарияланады деп ойлаймын", - деді Оразалин.

Сондай-ақ ол қазіргі уақытта қалада қураған ағаштарды тазалау бойынша шұғыл жұмыстар жүріп жатқанын атап өтті.

"Өкінішке қарай, Медеу ауданында, сондай-ақ қаланың орталық бөлігі мен Түрксіб ауданында қураған ағаштар көп. Мұндай ағаштарды дер кезінде кеспеу көбіне жағымсыз салдарға әкеп соғады және қала тұрғындарының өзіне үлкен қауіп төндіреді", - деді аудан әкімі.

Әкім нақты деректерді де келтірді: былтыр Медеу ауданында 2,5 мыңға жуық қураған ағаш кесілген. Биыл бұл көрсеткіш сәл төменірек, себебі, оның айтуынша, жасыл қорды жаңарту бойынша жүйелі жұмыс 8–10 жылдан бері жүргізіліп келеді.