Алматыда дәрігерлер 24 жастағы науқастың өмірін сақтап қалды

Алматыдағы Кардиология және ішкі аурулар ғылыми-зерттеу институтының дәрігерлері 24 жастағы науқастың өмірін сақтап қалды.

Жүрек жетіспеушілігіне шалдыққан қызға 46 жастағы әйелдің жүрегі салынды. Бұл осы институтта жасалған жетінші жүрек трансплантациясы. Күрделі операция сәтті өтіп, пациент оңалту кезеңіне дайындалып жатыр.

Жанна Туматаеваға 6 күн бұрын жүрек трансплантациясы жасалды. Ол жүрек жетіспеушілігімен дүниеге келіпті. Аурудың азабын әбден тартады. Ауыр дерттің дауасы – тек трансплантация еді. Жаннаға 46 жастағы әйелдің жүрегі салынды. Инсульт алып, миы істен шыққан донордың жақындары өзге адамдарды құтқаруға келісім берген. Соның арқасында Жанна сынды бірнеше науқастың өмірін құтқарып қалды.

Жанна Туматаева, реципиент:

- Шынымды айтсам, денсаулығым жақсарып, өмірдің жаңа парағын ашамын деген үмітім үзіліп бара жатыр еді. Дімкәс жүрекпен күн кешем деп ойлайтынмын. Сондықтан маған донор болған жанға және туыстарына, операция жасаған дәрігерлерге алғысым шексіз. Дәрігерлер нағыз ғажайып мамандар. Рахмет!

Операциядан кейін Жанна көбірек қимылдауға тырысып жүр. Ота жасалғалы бері жақын құрбысы Дарья жанында. Жүрсе сүйеу болып, ас-суын беріп көмектесіп келеді. Жаннаның жанында болу үшін ол жұмыстан демалыс алыпты. Дәрігерлердің айтуынша, осындай операциялардан кейінгі оңалту кезеңінде жақын адамның қолдауы ауадай қажет.

Дарья Мунтаниол, Жанна Туматаеваның құрбысы:

- Жаннаның қасына бір адам жатып көмектесу керек деген соң бірден келдім. Мұндай ауыр операция жасалған адам бір сәтке жалғыз қалмау керек. Сонымен қатар қазір Жаннаға физикалық және психологиялық көмек қажет.

Бұл Кардиология және ішкі аурулар ғылыми-зерттеу институтында жасалған жетінші жүрек трансплантациясы. Институт дәрігерлері жүрек алмастыру операциясын 2023 жылдан бастап жасайды. Дегенмен сау ағзаға мұқтаж жандардың саны көп екен. Өткен жылдың дерегі бойынша, елімізде 168 ересек адам және 7 бала жүрек ауыстыру кезегінде тұр.

Ғалымжан Сұлтанов, «Кардиология және ішкі аурулар» ҒЗИ кардиохирургі:

- Созылмалы жүрек жетіспеушілігі емдеу бағдарламасының негізінде осы кісіге жүрек алмастыру операциясы жасалды. Операциямыз сәтті өтті, операциядан кейінгі жағдай науқаста бірқалыпты. Алла бұйырса, келешекте реабилитация бөлімшесіне ауыстыруға дайындық жұмысы жүргізіліп жатыр.

Дәрігерлердің айтуынша, елімізде мәйіттік донорға деген көзқарас жақсарып келеді. Соңғы мәліметтер бойынша, қайтыс болғаннан кейінгі донорлыққа электронды түрде 12 мыңнан аса адам келісім берген.

Авторлары: Аршын Кемелжан, Айдос Қалиев