Алматыдағы Үш батыр ТК да заңсыз қайта құру жұмыстары тоқтатылды: не болды

Алматыда аты аңызға айналған "Үш батыр" тұрғын үй кешеніндегі нысанды заңсыз реконструкциялау тоқтатылды. Бұған дейін тұрғындар жертөледегі құрылыс жұмыстарына шағымданған болатын, деп хабарлайды Tengrinews.kz.

"Үй сілкініп жатыр": тұрғындар неге шағымданды?

2 қазанда КТК телеарнасы "Үш батыр" ТК тұрғындарының шағымы туралы хабарлады. Олардың айтуынша, жертөледегі жұмыстардың жүріп жатқанына бір айға жуықтаған.

"Реконструкция жұмыстарынан 12-қабаттың өзінде сілкініс сезіледі. Олардың көтергіш конструкцияларды қалай соққылап жатқанын түсінесіз бе? Біздің қауіп осы – үнемі сілкінеді. Бұл кішігірім жер сілкінісі сияқты", – деді тұрғындардың бірі журналистерге.

КТК сюжетінен скриншот

КТК сюжетінен скриншот

Жертөле жеке меншікке қалай өткенін тұрғындар білмейді. Олардың айтуынша, онда скалодром ашылады деп жоспарланған көрінеді.

Сондай-ақ тұрғындар нысан ішінде бұзылған қабырғалар мен құрылыс қалдықтарын көргендерін жеткізді. Олардың шағымынан кейін қалалық қала құрылысын бақылау басқармасы жоспардан тыс тексеріс тағайындады.

Қала құрылысын бақылау басқармасы Достық даңғылы, 44 мекенжайындағы үйдің №142 тұрғын емес жайы туралы сөз болып отырғанын түсіндірді.

Мамандар нысан иесі реконструкция жұмыстарын рұқсат беру және жобалау құжаттамасынсыз бастағанын анықтады.

"Басқарма тарапынан әкімшілік шаралар қабылданды. Меншік иесіне заңбұзушылықтарды жою, нысанға техникалық тексеріс жүргізу және белгіленген талаптар орындалғанға дейін құрылыс-монтаж жұмыстарын тоқтату туралы нұсқама берілді", – деп хабарлады басқарма.

Компания реконструкция жұмыстарын нұсқама талаптарын орындап, қажетті құжаттарды рәсімдегеннен кейін ғана қайта бастай алады.

Тексеріс нәтижесі жөндеу кезінде ғимараттың көтергіш конструкцияларына зақым келмегенін және олардың тұтастығы бұзылмағанын көрсетті.

"Үш батыр" ТК – Алматыдағы алғашқы зәулім кешендердің бірі, ол 1971 жылы салынған.

Анықтама. KAZGOR жобалау академиясы мәліметінше, тұрғын үй кешені сәулетшілер А. Петрова, Г. Жақыпова және Н. Чистоклетованың жобасы бойынша бой көтерген. Жоба конструкторы – Н. Л. Матвиец.

ТК мұрағаттық суреттерін KAZGOR ұсынды

Екі қабатты стилобатпен біріктірілген 12 қабатты үш мұнара жылдар өте келе Достық даңғылының сәулеттік нышандарының біріне айналды.

2019 жылы Алматы әкімдігі қасбетті жаңартудың үздік эскизіне конкурс өткізіп, онда сол кезде 25 жастағы алматылық Ерлан Мұратбек жеңімпаз атанған болатын.

Жобада кондиционерлерге арналған қорғаныс экрандары, ашық балкондар және оларды қылқан жапырақты өсімдіктермен көгалдандыру қарастырылған еді.

"Үш батыр" ТК қасбетінің 2019 жылғы эскизі / Фото: Шоқан Алхабаев

Алайда жобаны іске асыру бірнеше жылға тоқтап қалды. Жеңімпаз эскиздің авторы Ерлан Мұратбек бізге бұған алдымен пандемия, кейін үй тұрғындарының 100 пайыз келісім қолтаңбасын жинау талабы кедергі болғанын айтып берді.

2026 жылғы ақпанда Tengrinews.kz тілшілері әкімдік 2019 жылғы жобадан біржола бас тартқанын анықтады, ал концепция авторы оның идеясы қазір өзектілігін жоғалтқанын айтты.

Шілдеде Tengrinews.kz әкімдікке қайта жүгінді. Ондағылар сәулетшілер қасбетті жаңартудың жаңа жобасын әлі әзірлеп жатқанын хабарлады.

Әкімдік жаңарту жұмыстарының басталу мерзімін нақтылаған жоқ. Қаржыландыру көзі де анықталмаған – қала әкімшілігі бұл мәселені жобаның түпкілікті құны есептелгеннен кейін шешуге уәде берді.

Тағы оқыңыз: Алматыдағы аңызға айналған “Үш батыр“ тұрғын үй кешені жеті жылдан бері жаңартуды күтіп тұр: қазіргі жағдай қандай?

Бізді Google-дың негізгі дереккөздер тізіміне қосыңыз