Алматыдағы жер сілкінісі: Полицейлер мен өрт сөндірушілер аумақтарды аралап жүр

Мегаполистегі жер сілкінісінен кейін полиция жасағы мен өрт сөндіру көліктері аумақтарға тексеру жұмыстарын жүргізіп жатыр, деп хабарлайды Egemen.kz. 

Фото: Ашық дереккөз

Қалалық ТЖД баспасөз қызметі бұл туралы толық ақпарат берді.

«Сағат 13:10-дағы жағдай бойынша полицияның патрульдік көліктері мен өрт сөндіру бөлімшелері шағын аудандарды аралап жүр. Инженерлік-техникалық мамандар құрылыстар мен өзен арналарына тексеріс жүргізіп жатыр», деді ведомство басшылары.

«Қазселқорғау» мамандары өзен арналарына, гидротехникалық нысандарға қаупі бар және сел жүруі мүмкін учаскелерге тексеру жүргізіп жатыр. Сондай-ақ адамдар көп жүретін нысандардың ықтимал зақымдануы да назарда. Қазір олардың барлығы штаттық режимде жұмыс істеп тұр. ТЖД мәліметінше, зардап шеккендер мен қираулар туралы ақпарат түспеген.

Еске салайық, бұған дейін Алматы тұрғындарына жерасты дүмпулері сезілген. Пәтер қабырғалары мен шамдар сәл дірілдеген, көпқабатты үйлерде тұратындардың көбі қауіпсіздік үшін далаға шыққан.

ТЖМ хабарлауынша, 4 желтоқсанда 12:44-те сейсмикалық станциялар желісі жер сілкінісін тіркеген. Алматыдағы есептік жер сілкінісі қарқындылығы үш баллды құрады.

Жер сілкінісіне байланысты сенім телефоны іске қосылды. Сондай-ақ Алматы метрополитені жұмысын уақытша тоқтатты.