Полицейлер қазақстандықтардың пәтерлерін аралап жүр нақты не тексеріледі

Полицейлер 249 мыңға жуық тұрғын үй нысанын, оның ішінде 12,5 мың жалдамалы пәтерді тексерді. Бұл туралы ІІМ баспасөз қызметі хабарлады, деп жазады Tengrinews.kz.

5 қазаннан бастап еліміздің түкпір-түкпірінде "Қауіпсіз үй" жедел-профилактикалық іс-шарасы өтіп жатыр.

Нәтижесінде тіркеусіз тұрудың 9 мыңға жуық жағдайы анықталды. 7 189 шетел азаматы әкімшілік жауапкершілікке тартылды. Сондай-ақ белгілі бір тұрғылықты жері жоқ 2 128 адам полицияға жеткізілді.

Жасөспірімдер арасындағы құқық бұзушылықтың алдын алуға ерекше көңіл бөлінген. Рейдтер кезінде полиция түнгі уақытта ересектерсіз көшеде жүрген кәмелетке толмағандарға қатысты 3 883 жағдайды анықтады. Тағы 396 жасөспірім кәмелетке толмағандарды бейімдеу орталықтарына орналастырылды.

ІІМ ақпаратынша, Алматыда полиция кәмелетке толмаған баланың дәмханада болуына қатысты заңмен белгіленген шектеулерді бұзу дерегін анықтады. Мекеме иесіне қатысты әкімшілік іс қозғалды (Әкімшілік құқық бұзушылық туралы кодекстің 132-бабы 2-бөлігі бойынша). Дәмхана жұмысы 10 тәулікке тоқтатылды.

"Қауіпсіз үй" іс-шарасы 5 қарашаға дейін жалғасады.

2026 жылдың тоғыз айында полиция хабар-ошарсыз кеткен 17 мыңнан астам адамның жүрген жерін анықтады. Сондай-ақ Қазақстанда іздеуде жүрген 1 031 адам ұсталды.

Мәселен, Астанада алаяқтық жасады деген күдікпен 67 жастағы ер адам ұсталды. Тергеу мәліметтері бойынша, 2018 жылы Қарағандыда ол сатуды сылтау етіп, коммерциялық ұйымның қоймасынан құны 401 миллион теңгеден асатын тауарды алып кеткен.

Сонымен қатар Қазақстанда басқа елдердің құқық қорғау органдары іздеу салған 537 адам құрықталды.

Мысалы, Алматыда 1,3 миллиард теңгеден астам сомаға алаяқтық жасады деген күдікпен 45 жастағы шетелдік ұсталды. Тергеу нұсқасы бойынша, 2023 жылы Бішкекте ол Оңтүстік Кореядан косметика жеткізуді ұйымдастыруды сылтау етіп, жәбірленушіден ақша алған.

Еске сала кетейік, биыл Алматыда 177 қазақстандық полицияға көмектескені үшін ақшалай сыйақы алды. Оларға барлығы 9 миллион теңге төленді.

Бізді Google-дың негізгі дереккөздер тізіміне қосыңыз