Оралда тұз тапшы: тұрғындар дүкен аралап, сабылып жүр

Әлеуметтік желілерде тұрғындар бірнеше супермаркетті аралап шыққанымен, тұз жоқ екенін айтып жатыр, – деп хабарлайды Aikyn.kz сайты mgorod.kz сайтына сілтеме жасап.

Жергілікті тұрғындардың айтуынша, бұл жағдай алаңдаушылық туғызып отыр.

– Үй маңындағы үш дүкенді араладым, ешқайсында тұз жоқ. Сатушылардың айтуынша, барлығын бірнеше күнде сатып алып кеткен. Қайтадан 2020 жылға оралғандай күйдемін,-деді қала тұрғыны Айнұр.

Осыған ұқсас жағдайды Руслан есімді тұрғын да баяндады.

– «Дина» супермаркетіне арнайы тұз үшін бардым, бірақ сөрелер бос. Кейін орталық базарға бардым, ол жақта да жоқ. «Пешеходқа» соқтым, онда да таппадым. Етке не себемін? Жаңа ғана соғым етін едім,-дейді Руслан.

Расында да, тұз ірі супермаркеттерде де, шағын дүкендерде де жоқ. Базардағы сатушылар да тұздың не себепті жоғалғанын білмейді. Кейбір саудагерлер оралдықтар жаппай соғым маусымына дайындалып, қырыққабат тұздап жатқан шығар деп әзілдейді.

Ал жеткізушілердің айтуынша, Батыс Қазақстан облысына тұз жеткізу бір ай бұрын тоқтаған. Басты себеп — Қазақстандағы теміржол вагондарының тапшылығы. Қазан айының соңында күшіне енген жаңа тасымалдау ережелері тек қазақстандық жылжымалы құрамды пайдалануды талап етеді. Ресейлік «Соль-Илецкая» тұзы (ол арзан әрі БҚО-ға жеткізу ыңғайлы) енді өңірге кіре алмай отыр, ал отандық өндірушілер аймақтың қажеттілігін толық қамтамасыз ете алмайды.

Қазір қала тұрғындары бұл жағдай алдағы күндері реттеліп, тұз бұрынғы бағамен сөрелерге қайта оралады деп үміттеніп отыр.