Қазақстанда жылдың үздік журналистері мен медиажобалары анықталды

Tengri TV жобасы "Үркер" ұлттық сыйлығының "Үздік медиажоба" номинациясы бойынша жеңімпаз атанды. Марапаттау рәсімі 16 қазанда Астанада өтті, деп хабарлайды Tengrinews.kz.

Салтанатты шара Бейбітшілік және келісім сарайында өтті. Биыл "Үркер" және "Тұмар" ұлттық сыйлықтары он жылдық мерейтойға орай алғаш рет Qazaqstan Media Awards аясында біріктірілді.

Байқауға қатысуға 600-ден аса журналистен өтінім келіп түсті. Жеңімпаздар теледидар, радио, баспа және интернет басылымдарын, сондай-ақ жаңа медиа форматтарын қамтитын 12 номинация бойынша анықталды.

Тағы кімдер марапатталды?

"Үркер" сыйлығы аясында Bestnews.kz тілшісі Жанар Сердалина "Жылдың үздік журналисі" атанды.

Басқа номинациялар бойынша жеңімпаздар тізімі:

"Үздік радиожоба" - Қазақ радиосының "Ойтұма" бағдарламасы; "Жасанды интеллект саласындағы үздік жоба" - Altainews Media Centre ұсынған "AI-ЖАН" жобасы; "Жылдың үздік материалы" - Мирамгүл Рахатқызы, "Ақтөбе" газеті, "Жасанды интеллект: адамзат жаңа дәуірге аяқ басты" материалы үшін; "Үздік сараптамалық материал" - Лаура Түсіпбекова, "Казахстанская правда" газеті, "Моя ДНК - наше богатство" жарияланымы үшін.

Фото Нұрлан Алжабаев: Tengrinews.kz

Сондай-ақ салтанатты кеште "Тұмар" ұлттық телевизиялық сыйлығының лауреаттары жарияланды.

"Бірінші арна Еуразия" телеарнасының қызметкері Вероника Вишневская "Үздік тележүргізуші" деп танылды. Үздік деректі жоба номинациясын ағза трансплантациясына арналған "4739" фильмі үшін 24KZ телеарнасы иеленді.

Қалған номинациялар бойынша жеңімпаздар:

"Үздік телевизиялық материал" - "Қарқынды құрылыс", Qazaqstan телеарнасы; "Үздік әлеуметтік жоба" - "Правда в деталях", Jibek Joly; "Үздік телесериал" - "Ауыл бапкері", Астана TV; "Үздік ақпараттық-сараптамалық бағдарлама" - "Новости", 7-арна.

"Үркер" және "Тұмар" ұлттық сыйлықтары 2017 жылы журналистерді, редакциялар мен шығармашылық ұжымдарды қолдау мақсатында тағайындалған. 2024 жылы марапаттау рәсімі Qazaqstan Media Awards біріктірілген форматында өтті.

Бізді Google-дың негізгі дереккөздер тізіміне қосыңыз

Қосу