Қазақстанда жасанды интеллект бойынша үздік жобалар анықталды

АСТАНА, 1 сәуір – Sputnik. Астанада ұлттық AI-жобаларға арналған Alem.ai battle байқауының нәтижесі жарияланды, деп хабарлайды Sputnik Қазақстан жасанды интеллект және цифрлық даму министрлігінің ресми сайтына сілтеме жасап.

Байқауға барлық өңірден шамамен 830 өтінім түскен болатын. Соның ішінен 20 үздік команда финалға шықты. Байқау жеңімпаздары төрт негізгі бағыт бойынша анықталды.

AI Young Talents (мектеп оқушылары) санаты – "SuGuard" жобасы. Команда қандағы қант деңгейі мен диабет қаупін ерте анықтайтын AI-жүйе жасады. Жеңімпаздарға жобаны әрі қарай дамыту үшін арнайы ноутбуктар табысталды;

AI Driving Power (студенттер) санаты – "Ustaz AI" командасы. Олардың платформасы мұғалімдердің күнделікті жұмысын жеңілдетеді: тапсырма құрастырады, оқу материалын дайындайды және оқу процесін басқаруға көмектеседі. Командаға 5 млн теңге табысталды;

AI Innovators (зерттеушілер) санаты – "Robio" жобасы. Бұл – жасанды интеллектімен жұмыс істейтін арнайы қолғап. Ол дәрігерлерге сүт безіндегі өзгерістерді ерте кезеңде дәл анықтауға көмектеседі. Технология қолмен тексеру кезінде сезілетін белгілерді нақты деректерге айналдырады және ісіктің орнын, көлемін анықтай алады. Команда мәліметінше, жүйенің дәлдігі шамамен 90%. Қазір жоба прототип деңгейінен өтіп, клиникалық сынақтарға дайындалып жатыр. Жеңімпаздар 7 млн теңге иеленді;

AI Future Builders (стартаптар) санаты – "NCSpeech" жобасы. Бұл сервис SuperApp қосымшаларына қосылып, пайдаланушылардың күту уақытын пайдалы дерекке айналдырады. Осы арқылы жасанды интеллектіні оқытуға қажетті сапалы деректер жиналады. Жоба қазірдің өзінде сұранысқа ие болып, халықаралық нарықта жұмыс тәжірибесін көрсетіп отыр. Antler қорынан алғашқы инвестиция тартып үлгерген. Команда 10 млн теңгенің бас жүлдесін жеңіп алды.

Жобаларды бағалаған қазылар алқасының құрамында венчурлік қорлар мен технология саласының мамандары болды. Олардың ішінде Qazaqstan Venture Group бас директоры Асқар Белісбеков, Quest Ventures инвестициялар жөніндегі директоры Руслан Рақымбай, Astana Hub Cloud бас директоры Бахтиёр Эшонкулов, Tumar Innovation Hub бас директоры Рината Илюбаева, White Hill Capital негізін қалаушы Аслан Сұлтанов бар.