Қазақстандықтар келесі аптадан бастап өздерінің әл ауқат деңгейі туралы хабарламалар ала бастайды

Келесі аптадан бастап қазақстандықтарға отбасының әл-ауқат деңгейін бағалауға қатысты хабарлама келе бастайды. Бұл туралы еңбек және халықты әлеуметтік қорғау министрі Асқарбек Ертаев айтты, деп хабарлайды Tengrinews.kz тілшісі.

Министрдің сөзінше, әл-ауқат деңгейі туралы хабарламалар "А" санатына жататын азаматтардың шағын тобына жіберіліп қойған. Нәтижесінде кейбір отбасылар жәрдемақыдан өз еркімен бас тартқан.

"Қазір хабарламаларды тест режимінде шағын топқа жібердік, олардан 200 бас тарту тіркелді. Қазір техникалық жұмыстар жүргізіліп жатыр", – деді Ертаев.

Еңбек вице-министрі Бахтияр Жазықпаев келесі аптадан бастап хабарламаларды ауқымды түрде тарату жоспарланғанын атап өтті.

"Егер адам өзі қаласа және оған жәрдемақы қажет емес деп есептесе – одан бас тарту мүмкіндігі болады", – деп түсіндірді шенеунік.

Бұл ретте хабарламалар қазақстандықтарға жаппай жіберіле ме, жоқ па – ол жағы әзірге белгісіз. Ертаевтың айтуынша, бұл мәселе жұмыс тобында қаралып, содан кейін ғана таратудың алдағы тәртібі туралы шешім қабылданады.

Сондай-ақ шенеунік хабарлама жіберу адамға бірден тағайындалған әл-ауқат санаты хабарланады дегенді білдірмейтінін атап өтті. Оның айтуынша, азаматтарға тиісті құралды пайдалану мүмкіндігі туралы айтылады.

Бұған дейін қазақстандықтарға олардың қай әл-ауқат санатына жатқызылғаны туралы push-хабарлама жіберілетінін жазған едік. Деректерді тиісті талдау жыл аяғына дейін жалғасады. Толығырақ мына сілтеме арқылы оқыңыз.

Тағы оқыңыз:Bentley, бизнес және миллиондар: министр Қазақстанда кімдер жәрдемақысыз қалатынын айтты

Бізді Google-дың негізгі дереккөздер тізіміне қосыңыз