TikTok тан жұмыс тауып, Ресейде жоғалып кетті: қазақстандықты бір жылдан астам уақыт іздеп жатыр

Қазақстандық Қуаныш Арап 2025 жылдың көктемінде Ресейге нәпақа іздеп кетіп, бірнеше айдан кейін байланысқа шықпай қалған. Туыстары бір жылдан астам уақыт бойы оның қайда екенін және не болғанын білмей отырғандарын айтады. Tengrinews.kz жоғалған жігіттің қарындасымен сөйлесіп, Қазақстан ІІМ мен СІМ-не сауал жолдады.

"TikTok-тағы хабарландыру арқылы жұмысқа кетті"

20 жастағы Қуаныш Арап 2025 жылдың 24 сәуірінде Қазақстаннан Ресейге жұмыс істеуге кеткен. Қарындасы Назерке Арапованың айтуынша, ол жұмысты TikTok-тағы жарнама арқылы тапқан.

Онымен бірге Семейден бірнеше танысы бармақ болған. Автобус адамдарды әртүрлі қалалардан жинап өткен, алайда Шымкентте Қуаныштың достары сапардан бас тартып, үйлеріне қайтуды ұйғарады. Ол болса жолын жалғыз жалғастырған.

"Мен де сол кезде ағама: "Өтінемін, қайтшы" дедім. Ал ол: "Мен жұмыс істеуге бара жатырмын ғой" деп жауап берді. Біз 102 нөміріне хабарласып, Қуанышты шекарада тоқтатуды сұрадық. Бірақ бізге оның кәмелетке толғанын және сапарға қатысты шешімді өзі қабылдайтынын айтты", – дейді Назерке.

Фотоны жоғалған жігіттің қарындасы ұсынды

Ресейге барғаннан кейін Қуаныш отбасымен үнемі байланыста болған. Ол Мәскеу түбінде жүргенін айтып, жұмысы туралы баяндап отырған.

Қарындасының айтуынша, ол алдымен ет комбинатына орналасып, мұздатқыш бөлмеде жұмыс істеген.

"Ол бізге екі айлық жұмысы үшін ақы төленбегенін, сондықтан ол жерден кеткенін айтты. Кейін құрылысқа орналасып, онда бір аптадай жұмыс істеді де, байланыссыз кетті", – дейді Назерке.

Оның сөзінше, отбасына белгілі болған соңғы жатақхана мекенжайы – Строительная көшесі, 8-үй. Таныстары ол жерге барып көрген, бірақ ондағылар мұндай адамды танымайтындарын айтқан.

Назеркенің айтуынша, отбасымен соңғы сөйлесуі 2025 жылдың 21 тамызында болған.

"Қуаныш анасынан ақша аударатынын айтып, банк картасының деректерін жіберуді сұрады. Хабарламаны оқыған, бірақ содан кейін байланысқа шықпады. Оның тірі не өлі екенін білмейміз", – деді қарындасы.

Отбасы 2025 жылдың қыркүйек айында түрлі мекемелерге жүгіне бастаған. Туыстары полицияға, көші-қон қызметіне, елшілікке және басқа да мемлекеттік органдарға хат жазғандарын айтады.

СІМ еңбек құлдығы нұсқасын тексеріп жатыр

Қазақстанның Сыртқы істер министрлігі Tengrinews.kz-ке 12 қазанда Назерке Арапованың Қазақстанның Ресейдегі Елшілігінің консулдық бөліміне жүгінгенін хабарлады.

Ол ағасының Иркутскіде еңбек құлдығында болуы мүмкін екендігі туралы ақпаратты тексеруді сұраған.

"Түскен өтінішке байланысты Қазақстанның Ресей Федерациясындағы Елшілігінің консулдық бөлімі баяндалған мәліметтерді тексеру мақсатында Ресейдің құзыретті органдарына тиісті ноталар мен хаттар жолдады", – деп хабарлады СІМ.

Сонымен қатар елшілік Қазақстанның Омбыдағы Бас консулдығына түскен ақпаратты бөлек тексеруді тапсырды.

СІМ 2 қазаннан бастап Ресейдегі қазақстандық шетелдік мекемелер жанында қиын жағдайға тап болған Қазақстан азаматтары туралы ақпарат жинау үшін жедел желі жұмыс істейтінін айтты

Қазақстан СІМ Консулдық қызмет департаменті: +7 (7172) 72-05-00, [email protected] Қазақстанның Ресейдегі Елшілігі: +7 (925) 897-71-14, [email protected] Астрахандағы Бас консулдық: +7 (906) 177-70-88, [email protected] Қазандағы Бас консулдық: +7 (905) 020-30-42, +7 (843) 202-05-92, [email protected] Омбыдағы Бас консулдық: +7 (968) 100-73-06, [email protected] Екатеринбургтегі Бас консулдық: +7 (939) 919-76-33, [email protected] Санкт-Петербургтегі Бас консулдық: +7 (981) 916-25-12, +7 (921) 188-90-60, [email protected] ІІМ не дейді?

Қазақстан ІІМ полицияның да Қуаныш Араповты іздеумен айналысып жатқанын хабарлады.

"Сауалда көрсетілген дерек бойынша ішкі істер органдары іздеудегі адамның жүрген жерін анықтау үшін қажетті шараларды қабылдап жатыр", – деп хабарлады ведомство.

Қуаныштың отбасы оның жүрген жері туралы кез келген расталған ақпаратты күтіп отыр. Қарындасының айтуынша, туыстары түрлі инстанцияларға жүгінген және қазір тым болмаса оның қайда екенін және не болғанын білуден үмітті.

Редакция оқиғаның дамуын бақылауды жалғастырады.

Қазақстандықтарға әлеуметтік желі арқылы жұмыс іздеудің қаупі туралы ескертілген болатын

2024 жылдың сәуірінде Қазақстан СІМ әлеуметтік желілер арқылы жұмыс іздейтін азаматтарға ескерту жасаған болатын. Сол кезде ведомство шетелде жұмысқа орналасу туралы күмәнді ұсыныстардың қауіп-қатеріне назар аударған еді.

Ал 2025 жылдың шілдесінде Tengrinews.kz қазақстандықтардың шетелдегі тиімді жұмыс желеуімен еңбек және жыныстық құлдыққа қалай тартылатыны туралы егжей-тегжейлі баяндаған болатын. Сол кезде мамандар келтірген мәліметтер бойынша, қаскөйлер жоғары жалақы мен жұмысқа орналасудың оңай шарттарын уәде етіп, интернет пен әлеуметтік желілердегі хабарландыруларды жиі пайдаланады.

Бізді Google-дың негізгі дереккөздер тізіміне қосыңыз

Қосу