Мұқтаж емес: 200 ден астам тұрғын жәрдемақыдан ерікті түрде бас тартты

АСТАНА, 16 қазан – Sputnik. Премьер-министрдің тапсырмасына сәйкес, Еңбек және халықты әлеуметтік қорғау министрлігі жанындағы жұмыс тобы туындауы мүмкін сұрақтар бойынша кеңес беру мақсатында өңірлерді аралап, аумақтық департаменттер базасында түсіндіру жұмыстарын жүргізді.

Министрлік жергілікті атқарушы органдармен бірлесіп, әл-ауқат деңгейі жоғары санатқа жатқызылған үй шаруашылықтарына қосымша тексеріс жүргізіп жатыр.
Бүгінде SMS-хабарламалар жіберу нәтижесінде 200-ден астам азамат әлеуметтік көмекке мұқтаж болмағандықтан, жәрдемақы алудан бас тартатынын мәлімдеді.

"Осы бағытта министрлік eGov Mobile қосымшасына енгізілетін жәрдемақыдан ерікті түрде бас тарту сервисінің жаңа жобасын таныстырды. Оның көмегімен әлеуметтік жәрдемақы алатын тұрмысы жоғары азаматтар мемлекеттік органдарға бармай-ақ, онлайн режимде төлемдерден өз еркімен бас тарта алады", - дейді Еңбек және халықты әлеуметтік қорғау министрлігі.

Үкімет жетекшісі министрлікке мүдделі мемлекеттік органдармен бірлесіп, екінші деңгейлі банктерді "Отбасының цифрлық картасына" қосуды жеделдетуді тапсырды.

Әлеуметтік қолдау шараларына өтініш қабылдау және оларды тағайындау функционалы Бірыңғай цифрлық платформада биыл маусым айында іске қосылған. Сол кезден бері ол арқылы жалпы сомасы 2,5 млрд теңгеден асатын 55 мыңнан астам өтініш түсті. Оның ішінде 1,8 млрд теңгеден астам сомаға өтініштер қаралып, мақұлданды. Қазіргі уақытта платформа "Отбасының цифрлық картасымен" интеграцияланып жатыр.