Кредиттерден ерікті түрде бас тарту: Стоп кредит тетігі қалай жұмыс істейді

Қаржылық алаяқтықтан қорғау үшін қарыздарды ресімдеуден ерікті түрде бас тарту қызметі қолданылады. Әрбір азамат банктік кредиттер мен микрокредиттер алуға тыйым сала алады. Қызмет порталда және E-gov мобильді қосымшасында қолжетімді.

Қызметті компьютерден іске қосу үшін egov.kz сайтындағы жеке кабинетке кіру, «Сервистер» бөлімін ашу, «Банктік қарыздарды, микрокредиттерді алудан ерікті түрде бас тарту» бөлімін таңдау, электрондық нысанды толтыру және ЭЦҚ өтінішіне қол қою қажет, нәтижесі «Қызметтерді алу тарихы» бөлімінде көрсетіледі.

Қызметті E-gov мобильді қосымшасы арқылы да пайдалануға болады. «Қызметтер» бөлімінде «Салықтар мен қаржыны» таңдау қажет, одан әрі «Кредит алудан ерікті түрде бас тарту» қызметін таңдау қажет. Осыдан кейін деректерді толтырып, сұрау салуды электрондық түрде растау қажет.

Қызмет белсендірілгеннен кейін кредиттік тарихта қарыз алудан бас тарту туралы белгі пайда болады. Кредиттік бюроларға жүгінетін банктер мен микроқаржы ұйымдарына осы ақпарат қолжетімді болады. Кредитке өтiнiм түскен жағдайда қаржы ұйымдары беруден бас тарту туралы шешiм қабылдайды. Егер белгіленген тыйым салуға қарамастан, қарыз сіздің келісіміңізсіз ресімделсе, онда ол есептен шығарылуға жатады.

Қажет болған жағдайда қызметті кез келген уақытта өшіруге болады. Бұл шектеу кредиттік бюроларды пайдаланбайтын ломбардтар мен басқа да ұйымдарға қарыз алушыларды тексеру үшін қолданылмайтынын атап өту қажет.

2026 жылғы 16 наурыздағы жағдай бойынша банктік қарыздар мен микрокредиттер алудан ерікті түрде бас тарту құқығын - «Стоп-кредит» сервисін Қазақстанда 5,1 млн азамат пайдаланды.

Қосымша пайдалы материалдарды Fingramota.kz. сайтында алуға болады.

Бүгін, 10:09