Қазақстанда зейнетақы жинақтарына кепілдік беру тәсілі өзгереді: Еңбек министрінің мәлімдемесі

Қазақстанда зейнетақы жинақтарына кепілдік беру тәсілі қайта қаралады. Бұл туралы Орталық коммуникациялар қызметінде өткен брифингте еңбек және халықты әлеуметтік қорғау министрі Асқарбек Ертаев айтты, деп хабарлайды Tengrinews.kz тілшісі.

Министрдің сөзінше, азаматтардың зейнетақы жинақтарының сақталу кепілдігі Әлеуметтік кодекс бабында бекітілген. Ертаев өзгеріс инвестициялық табысқа ғана қатысты екенін атап өтті.

Қазір қазақстандықтар өздерінің зейнетақы жинақтарын жеке басқарушы компаниялардың басқаруына бере алады. Министрдің айтуынша, осыған байланысты инвестициялық табысқа кепілдік беру үшін республикалық бюджеттен қаражат бөлу бұдан былай қарастырылмайды.

"Азамат қаражатын қай жеке компанияға орналастыратынын, қандай инвестициялық табыс алуға болатынын өзі таңдайды, бұл мәселелер нақты жеке басқарушы компаниялармен немесе БЖЗҚ-мен келісіледі", - деп түсіндірді ол.

Бұған дейін 2027 жылғы 1 қаңтардан бастап Қазақстанда зейнетақы жинақтарын қорғау ережелері өзгеретіні туралы жазған едік. Мемлекет шотқа нақты түскен міндетті зейнетақы жарналарының сомасына ғана кепілдік береді. Бұл қаражаттың инфляция салдарынан құнсыздануы бұдан былай өтелмейді. Толығырақ мына сілтеме арқылы оқыңыз.

Тағы оқыңыз: 2027 жылы зейнетақы жинақтарында не өзгереді? Еңбекмин түсіндірді

Бізді Google-дың негізгі дереккөздер тізіміне қосыңыз