Киевтің Еуроодаққа қосылуына он жылдан астам уақыт қажет БАҚ

АСТАНА, 6 мамыр – Sputnik. Еуропалық комиссия (ЕК) Украинаның Еуроодаққа кіру талаптарын орындау үшін кем дегенде 10-15 жыл қажет деп санайды, деп хабарлады британиялық Financial Times газеті ЕК өкілдеріне сілтеме жасай отырып.

"Украинаның қосылу талаптарын толық орындауы үшін 10-15 жыл қажет болады", - деп жазды басылым.

Владимир Зеленский бұған дейін Еуроодақтан Украинаны 2027 жылы блокқа қабылдауды талап еткен.

Дегенмен Economist сәуір айында хабарлағандай, бірқатар еуропалық мемлекет Киевтің блокқа қосылуына қарсы, бұл негізінен елдегі сыбайлас жемқорлық проблемаларына байланысты болып отыр.

Еуродипломатия басшысы Кая Каллас Еуроодаққа мүше мемлекеттердің Украинаның одаққа қосылу күнін жариялауға дайын емес екенін мойындады. Сонымен қатар Ресей президентінің баспасөз хатшысы Дмитрий Песков Еуроодаққа қосылуды Киевтің тәуелсіз құқығы деп атады.