Криштиану Роналду ұлттық құрамадан кететінін мәлімдеді

АСТАНА, 4 қараша – Sputnik. Криштиану Роналду Португалия құрамасынан кететінін мәлімдеді, деп хабарлайды Sputnik Қазақстан.

41 жастағы футболшы әлеуметтік желіде өз жанкүйерлеріне үндеу жолдады.

"Португалдықтар үшін бәрімізге тиесілі 7 нөмірлі жейдені қайтаратын күн келді. Мен оны ешқашан тек өзімдікі деп санаған жоқпын, бірақ 23 жыл бойы оны алып жүру, қорғау және бүкіл әлем бойынша стадиондарға апару мен үшін үлкен мәртебе мен жауапкершік болды. Бүгін осы жейдені болашаққа тапсыратын сәт келді. Бұл оңай шешім болған жоқ, өйткені тек баспен ғана емес, жүрекпен де қабылданатын шешімдер бар. Мен 2003 жылдың тамызында басталған және өмірімді түбегейлі өзгерткен жолды аяқтаймын ", - деді Роналду.

Аңызға айналған футболшы артқа қарап, тек матчтарды, голдарды, рекордтарды немесе олжаларды емес, 90 минут бойы өздерін Португалияға жақынырақ сезінген эмигранттарды көретінін ерекше атап өтті.

"Мен ешқашан кездестірмеген, бірақ менің өмірімнің бір бөлігіне айналған миллиондаған португалдықты көремін. Өйткені футбол жай ойыннан әлдеқайда үлкен. Футбол — бұл адамдар", - деді Роналду.

Криштиану Португалияның негізгі құрамасында 234 матч өткізіп, 146 гол соққан. Ол ұлттық құрамада ойнаған матчтар мен голдар саны жағынан ерлер футболының тарихындағы абсолютті әлемдік рекордшы болып отыр.

Роналду ұлттық құрамадағы мансабын аяқтаса да, клубтық жарыстарға қатыса береді. Қазір ол Сауд Арабиясының "Әл-Наср" клубында шабуылшы позициясында өнер көрсетеді.