Оралда тұрғындар жаңадан салынған үйге неліктен кіре алмай отыр

Instagram әлеуметтік желісінде жарияланған бейнежазбадан мәлім болғанындай, С.Камалов көшесі 16-мекенжайда көппәтерлі тұрғын үй бой көтерген.

Тұрғындардың сөзіне қарағанда, «Дамустройинвест» құрылыс компаниясы рұқсаттама талонын алып, сондай-ақ жарық, газ, кәріз желілеріне қосылуға қажетті барлық келісімді алғаннан кейін құрылысты жүргізген.

Үй толықтай салынып біткен, инженерлік желілерге қосылған және пайдалануға беруге дайын.

Алайда, соған қарамастан, қазіргі таңда Орал қаласының әкімдігі мен БҚО мемлекеттік сәулет-құрылыс бақылауы басқармасы нысанды пайдалануға қабылдауға рұқсат беруден бас тартты.

- Соның салдарынан үлескерлердің, яғни өз пәтеріне ақшасын толық төлеген азаматтардың құқықтары бұзылуда. Салынған нысан жанында тұратын бір көршінің бастамасымен сотқа арыз түсіріліп, соның нәтижесінде үй заңсыз салынған деп танылды. Бұл шешім елудей отбасының тағдырын қатерге тігіп отыр, олар бар қаражатын осы үйге салған, енді баспанасыз қалу қаупі туындады, - дейді тұрғындар.

Осыған байланысты Kazinform тілшісі мәселенің мән-жайын анықтау үшін БҚО мемлекеттік сәулет-құрылыс бақылауы басқармасына арнайы сауал жолдаған еді. 

Басқарма басшысы Әлібек Антазиевтің мәлімдеуінше, төрт қабатты, коммерциялық бөлмелері бар 22 пәтерлік тұрғын үй құрылысы 2024 жылы тамыз айының ортасында басталған. 

Сол жылы қыркүйекте жапсарлас жер телімдерінің иелері құрылыс салушының тарапынан өз құқықтарының бұзылғаны жөнінде ҚР Өнеркәсіп және құрылыс министрлігінің Құрылыс және тұрғын үй-коммуналдық шаруашылық істері комитеті мен БҚО мемлекеттік сәулет-құрылыс бақылауы басқармасына шағымданған. Тексеру қорытындысы бойынша қараша айында олар үйді сүріп тастау жөнінде талап арыз түсірген. 

- Бұзушылықтар анықталған кезде құрылыс бастапқы кезеңде еді. Аталмыш мәселе туындағанын біле тұра, құрылыс салушы жапсарлас жер телімдері иелерімен келіспеушілік реттелгенге дейін үй тұрғызуды уақытылы тоқтатпай, үлескерлер қаржысын тартты. Құрылыс салушыда үлескерлер қаржысын тартуға рұқсат болған жоқ. Аталған нысан бойынша азаматтардың қаржысын тарту заңсыз болып табылады, сондықтан кері қайтарылуы тиіс.

Аталған нысан әлеуметтік немесе қайырымдылық мақсатты көздемейді. Құрылыс салушы пәтерлер мен коммерциялық орындарды сатудан пайда табады, - дейді Ә.Антазиев. 

Оның айтуынша, сот талқысы және сот-құрылыс сараптамасы барысында нысанның егжей-тегжейлі жоспарлау жобасына сәйкес келмейтіні (аталған ауданда екі қабаттан жоғары емес тұрғын үйлер салуға рұқсат беріледі), жақын тұрған ғимараттардан өртке қарсы және санитарлық бос жердің жоқтығы анықталды. 

- Биылғы 30 мамырда Орал қаласының № 2 соты аталған нысанды сүруді құрылыс салушыға міндеттеу туралы шешім шығарды. Жергілікті атқарушы органдар тарапынан үлескерлер қаржысын тартуға рұқсаты жоқ құрылыс салушылардың тұрғын үйлеріне қаражат салмау жөнінде тұрақты түрде түсінік жұмыстары жүргізіліп келеді. Сол секілді Тәуелсіздік көшесі 39-мекенжайында төрт қабатты үй ешқандай рұқсат құжаттарынсыз салынған. Бұл заңсыз нысанды сүру жөнінде биылғы 29 қыркүйекте сот шешімі шықты. Облыс әкімінің тапсырмасына сәйкес Орал қаласы әкімдігі және біздің басқармамен заңсыз салынған құрылыс нысандарын анықтау мақсатында мониторингілік топ құрылып, жұмыс істеуде, - деп қосты Ә.Антазиев. 

Еске сала кетейік, бұдан бұрын Батыс Қазақстанда 40-тан астам нысанда құрылыс талаптары сақталмағанын жазған болатынбыз.

Посмотреть эту публикацию в Instagram

Публикация от Строительство в Уральске| Продажа кирпича с заводов| Утеплитель (@damustroyinvest)