Алматының инженерлік желілері ауқымды түрде жаңартылады

Алматының инженерлік желілері ауқымды түрде жаңартылмақ.

Бұл міндет «Энергетика және коммуналдық секторды жаңғырту» ұлттық жобасы аясында іске асады. Жоспар бойынша 2029 жылға дейін шамамен 200 шақырым жылу желісі салынып жаңартылады. Оған қоса су құбырлары мен кәріз жүйесі жөнделеді. Электр желілері де тартылады. Бұл туралы ұлттық жоба операторы мәлімдеді. Арнайы электронды платформада атқарылған жұмыс пен қаржы ашық көрсетіледі. Ұлттық жоба 2025–2029 жылдарды қамтиды. Ел бойынша 86 мың шақырым коммуналдық желі жаңартылып, жаңа энергия көздері іске қосылады. Жалпы инвестиция көлемі 13 триллион теңгеден асады. Жобада отандық компанияларға басымдық беріліп, импортқа тәуелділікті азайтып, жаңа жұмыс орындарын ашуға мүмкіндік беріледі. Қазір Алматыда 230-дан аса лицензияланған құрылыс және жобалау компаниясы жұмыс істейді. Бұл республика бойынша ең жоғары көрсеткіш.

Тимур Қосымбаев, ҚР Ұлттық экономика министрлігі табиғи монополияларды реттеу комитетінің төрағасы:

- Мердігерлер өз міндеттерін толыққанды орындайды. Яғни жобалау мен құрылыс жұмысы бір уақытта жүргізіледі. Бұрын жобалаушы мен құрылысшы бөлек жұмыс істейтін. Содан кейін жобаны іске асыру барысында кедергілер көп болатын. Енді мұндай жағдайлар болмайды. Бұл әдіс жоспарды уақытылы орындауға мүмкіндік береді.